Shillong, Jylliew 19: Ka Jylla Meghalaya kala sakhi ia ka jingshah ktah palat 5.8 lak ngut ki nongshongshnong bad palat 700 tylli ki shnong na ka jingther u slap ha kine ki arbnai shiteng bala leit noh.
Kat kum ka khubor bala pyllait da ka State Disaster Management Authority (SDMA) hynnin ka sngi saitjaiñ la pyntip ba nadu ka 1 tarik Iaiong ba la sdang ka jingwan lynshop u slap bad ka eriong ha Jylla, haduh 5,85,999 ngut ki nongshong shnong bad haduh 772 tylli ki shnong kila shah ktah.
Ka SDMA ka pyntip ruh ba hapdeng kane ka por, haduh 27 ngut ki briew kila iap, 8 ngut kila jah rngai bad haduh 20 ngut kila mynsaw. Ka jingpynjulor ia ki jingthung jingtep kala kot sha a 27 hectare eiei. La iathuh ba tang hapdeng ka sngi thohdieng-saitjaiñ, haduh 15 hectare ki jingthung jingtep kila shah pynulor.
Naduh ka 1 tarik Iaiong, haduh 3981 tylli ki Iing kila shah pynjulor ha kaba haduh 258 tylli kila julor lut ploiñ, 89 tylli kila julor jur bha bad 3437 tylli kila julor mar shiteng. Hapdeng kane ka por, haduh 15 tylli ki jingri jingdup kila iap na ka jing hep u slap.
Ha kine ki arphew saw kynta bala leit noh, ka jingther u slap kala ktah ia kumba 25 tylli ki Shnong bad haduh 134 ngut ki briew kila ngat ha ka apot. Na kine ki Iing ba shah pynjulor, tang kawei kaba la julor lut katba kiwei kila julor ha ki bynta bynta.
Haba phai sha ki jingtei bala julor ha ki 24 kynta bala leit noh, hangne ha East Khasi Hills-kawei ka jingkieng ba sh sdien kala julor lut ha Suktia, ka surok SPV ha Pyrkan Shella kala julor na u slap bad jingtwa khyndew, kawei ka lynti iaid kjat ha Sonatala kala khyllem.
Ha South West Khasi Hills, kawei ka surok MGNREGS bala tei ha u 2021-2022 kala julor na ka jingtwa jong ka khyndew ha Mawblei VEC kaba hap hapoh ka Mawkyrwat C&RD Block.
Ha East Jaiñtia Hills, ka jingtwa khyndew kala pynjulor ia ka ynronha ka Umkiang Primary Health Centre.
Haba phai sha ki Relief Camp ne ki jaka sah ba shipor, ka sorkar kala dep buh haduh 26 tylli ha ka Jylla hynrei ym shym la don satia ki lanot kiba poi rieh tngen ha kine ki jaka ba pynkhreh da ka Sorkar.
Ka SDMA ka pyntip ba watla ka jingpnynjulor jong u slap kala iaid palat 2 bnai, hynrei ka Sorkar kam pat sdang sam satia ia kino kino ki mar jingiarap sha ki briew ba shah ktah ha ka Jylla.
