Shillong, Risaw 17 : Na ka Liang ka Mawlai Sports & Cultural Club da ka mynsiem jong ka jingkmen halor ka jingwanrah burom jong u samla Donbor Rumnong ha ka jingiakhun pyni dohksah ba la tip kum ka “WFF Pro-AM Asia Pacific championship” ka ba la long ha ka 15/10/2022 ha ka Nongbah Ho Chi Minh , Vietnam.
Ka Club kam lah khlem da ai ka Burom ka ba khraw ia une u Samla Donbor Rumnong u ba dei u khun jong U (L) Bah Edwinstar Shangpliang bad ka Kong Anita Rumnong ba Shong basah ha Mawlai Nongkwar bad mynta u shong u sah ha Mawlai Mawdatbaki Nongmali lll ryngkat ka Kurim ka Kong Magreeta Snaitang bad ar ngut ki khun.
Ka jingtrei minot jong u miet la bad sngi da ka jingminot thop ba jarjar ka jong u, ula lah ban poi sha ka thong bad ban kheit ia u soh jong ka jingjop da ka ba ioh ia ka takma rnong (Bronze Medal) ka ba long ka burom ia ka Ri, ka Jylla bad ia ka Shnong Mawlai hi baroh kawei.
Kumta ruh na ka liang ka Club ka kitbok kitrwiang ba un dang lah ban kiew shaphrang bad ba un long ka nuksa ia kiwei pat ki Samla kiba don ka jingthmu ban poi sha ka thong ha ka jingim jong ki. Kane ka long katkum u kyrwoh lyngba u Bah M.Nongsiej General Secretary ka Mawlai S & CC.
