Guwahati, Risaw 17 :Ka video kaba pyni ia u kyrtong president na ka bynta ka ilekshon hapoh ka seng Congress u Shashi Tharoor uba dang ia shad ia kmen ryngkat bad ki nongrwai bad nongshad Bihu kala saphriang bha lyngba ki social media.
Ha kane ka video la iohi ia u Shashi Tharoor uba dang shad ia ki jingtem jingput jong ka kynhun hapoh Rajiv Bhawan ha Guwahati, Assam.
Haba kren sha ki lad pathai khubor ha ka nongbah Guwahati, u Tharoor ula ong ba dei tang ka party Congress hapoh ka ri India ka bym don ka jingngeit halor ki kam sain hima kiba pynshong nongrim lyngba ka jingiapher jaitbynriew, ka jingiapher ha ka ktien ka thylliej bad ha ka niam ka rukom.
“Dei tang ka party ka jong ngi kaba kwah ia baroh ba kin don ryngkat lang bad ngi, kata khlem da khein ia ka jingsngew iapher niam, ka jinglong shynrang kynthei, ka jingiapher ha ka ktien ka thylliej, ka niam ka rukom, ka thain lane ka jylla,” ong u Tharoor u kyrtong uban ia aireng ha ka jingjied ia u president bathymmai jong ka seng Congress ha ka nongbah Guwahati, Assam.
Haba kren halor kane ka jingia aireng ka jong u bad u nongialam bala rim ka Congress, u Mallikarjun Kharge na ka bynta ka kam president jong ka party, u Shashi Tharoor ula ong ba ha kaba kut jong ka sngi, kan dei ka party Congress ka ban long ka nongjop.
“Kam lei lei lada u Kharge Sahab un jop lane ma Nga ngan jop – ka Congress ka dei ban ioh ia ka jingjop namar ka dei ka party kaba pdiang lut ia baroh hapoh ka ri India,” ong u Shashi Tharoor.
Na ka laine une u kyrtong u ban iakhun ia katei ka kam president hapoh ka seng Congress ula wan poi ha ka nongbah Guwahati ha kane ka sngi Saitjain ba la lah na ka bynta ban pan jingkyrshan halor kane ka jingai aireng na ka bynta ka jingjied ia u president bathymmai jong ka party Congress.
