Shillong, Naiwieng 8: U Myntri Rangbah ka Jylla u Conrad K Sangma hynne ka sngi u Blei ula ai khublei ia baroh ha ka jingrakhe ia ka Diwali ne kaba la tip ruh kum ka ‘Festival of Lights’.
Haba pynapw ha ka rynsan X, u Sangma ula ong ba kane ka tamasa kadei ka jingrakhe ia ka jingkyrmen, jingiatylli bad ka jingpynthymmai.
“Ha kane ka sngi ba kyrpang jong ka Diwali, ‘Festival of Lights’, Nga phah ia ka jingkhublei naduh dohnud bad ka jingkitbok kitrwiang ia kito baroh kiba rakhe ia kane” ong u Sangma.
“Ai ba ka jingsuhsieng jong kane ka jingrakhe kan pyndap ia ki iing bad ia ki dohnud da ka jingkmen, jingbha, ka koit ka khiah bad ka jingseisoh kaban iaineh” ula bynrap.
“Ka Diwali kam dei tang ka jingrakhe ia ka jingshai halor ka jingdum, hynrei kadei ruh ka jingpynkynmaw ia ka bor jong ka jingiadonlang, jingkyrmen bad jingpynthymmai” ula ong.
“To ngin ia pdiang ia ka mynsiem ba shisha jong kane ka jingrakhe da kaba pynsaphriang ia ka jingsuk, jingsbun mynsiem bad jingiatylli ha ka imlang sahlang” ula bynrap.
“Kitbok ia phi bad ia ki baieid bathoiñ ka jingshngaiñ, jingshai bad ka Diwali kaba kmen” ula ong.
