Pynlut ka Sorkar T.4000 klur sha ka pule puthi bad T.1200 klur sha ki Nonghikai
Shillong, Naiwieng 04 : Ka Meghalaya kala pynlut haduh T.4000 klur shisnem ha ka pule puthi hynrei ka pule pule kaba bha kan nang kiew tang lada ki khynnah pule kila don hapdeng eh jong ka policy, ong u Myntri Rangbah Conrad K Sangma ha ka sngi Balang.
“Ka Sorkar kala pynlut jan T.4000 klur manla u snem ha ka pule puthi, namar ka pule puthi ka dei kaba donkam bha. Hynrei tang ka pisa marwei ka dei ka bym lah ban thew. Haba kut ka sngi, ka pule puthi kaba bha ka dei kaba ngi donkam ban kiew shaphrang. Bad kane kan wan lyngba kawei ka rukom pyrkhat-buh ia ki khynnah pule hapdeng eh jong baroh ki kam shim rai” ong u Conrad.
Ula kren ia kane hadien ba dep plie ia ka Higer Secondary Section ba thymmmai bad buh ia u maw nongrim jong ka Auditorium ka Presbyterian Higher Secondary School, Shillong, ha ka jingrakhe dap 126 snem.
Haba ai nguh ia u Blei halor ka jingiaid lynti kane ka jaka pule, u Myntri Rangbah ula ong “Ka pule puthi ka dei kawei na ki atiar ba khlain bor tam ban wanrah ia ka jingkylla ha ka imlang sahlang. Ngam tharai ban don kano kano ka jingkynshew kaba heh ban ia ka jingkynshew ha ka pule puthi bad ki skul”.
Haba pynkynmaw ia ka jingbun kiba pheil ia ki samla SSLC ha ki snem bala leit, ula ong ‘Ngi la don ka por ba haduh 50% ki khynnah pule kila pheil ia ka SSLC. Kane ka mut ba ki jingphohsniew jong ki, kila kut noh wat hashuwa ba kin sdang phohsniew”.
Ula pyniasnoh ia ka jingpep skul shiteng por bad ka jingduna ki iingskul, haba iathuh ba ka Jylla ka don haduh 9000 tylli ki skul Lower Primary hynrei ka don pat tang 500 tylli ki Higher Secondary bad tang palat 100 ki college, kaba kiew na ka 80 kham hashuwa. “Khlem pep ngi donkam ban pynkha shuh shuh ia ki Higher Secondary School. Ngi donkam ban pynkha kham bun ki college. Kine ki kam kin ym urlong tang ha ka shi samoi. Ka shim por” ula ong.
U Conrad ula ong ba ka Sorkar jong u kala ioh pateng ia ka jingbym shongsuk ba manla u snem da ka jingmih ki nonghkai Adhoc bad SSA kiba dawa ban pynthymmai ia ka tulop. “Ka Sorkar kala pynlut haduh T.1200 klur shis nem tang sha ka tulop ki skul bad college ba ioh grant in aid. Wat ka jingpynkiew ba 10% ka mut kala ktah haduh T.120 klur” ula ong haba bynrap ba ka Sorkar kala jied ia ka jingiakren ban ia ka jingialeh pyrshah.
Ula ong ba ka CM IMPACT programme kala kyntiew ia ka jingpass ki khynnah pile ha ka SSLC na ka 50% ha ki san snem mynshuwa sha ka palat 90% mynta.
U Conrad ula pynrem ia ka jingshim rai kaba la pynshong nongrim halor ka jingdon pisa, ka sain pyrthei lane ki jingpynbeit ba shipor da kaba ong “Bun na ngi, ngi klet ia ki khynnah. Ngim ju kylli-Hato kane ka long kaba dei ia ki Khynnah?”.
Ula kyntu ia ki nonghikai ban shim ia ka lynti na ka jinghikai ia baroh kawei ka klas sha ka jingsaindur ia man ki khynnah pule da ka jingshimkhia hi shimet, haba pynpaw ba man ki khynnah ki iapher ha ka sap pule.
U Myntri Rangbah ula pynbna ia ka jingthmu ban kyrshan ia palat 700 tylli ki skul Secondary bad Higher Secondary kiba don mynta shabar ka jingioh jingkyrshan song pisa na ka Sorkar.
