Shillong, Naiwieng 02: U Myntri Rangbah ka Jylla Conrad K Sangma ha ka sngi Nyngkong, u la kyntait ïa ka jingkynnoh jong ka Congress ba ka National People’s Party (NPP) ka thmu ban pynduh jait ïa ki paralok seng sain pyrthei ba ïatrei lang, kum iaka People’s Democratic Front (PDF) bad mynta sa ka United Democratic Party (UDP).
“Kam dei ba ngi mut pynduh jait noh iano iano ruh. Ngi la iatreilang bad baroh la slem bha mynta bad ki MLA shimet shimet ki la sngew ba ki kwah ban wan iatreilang noh bad ka NPP bad ki la pynpaw ia ka jingngeit jong ki ha ka party, ki la pynpaw ia ka jingngeit jong ki ha ka jinglong nongialam” la ong u Conrad.
U Conrad ula ong ba ia kane ka rai la shim da ki MLA ban pynkhlain ia ka party bad iaka Sorkar.
“Kumta ka dei tang ka rai kaba la shim daki MLA kiba wan iasoh bad ngi ban pynkhlain ia ka Party bad iaka Sorkar bad ruh ban pynthikna ba ngi lah ban treikam ha ka rukom kaba kham skhem bha ha ki sngi ban wan, la ka long ha kane ka samoi treikam mynta ne kumjuh ruh ban peit iaka lawei ha kaba iadei bad ka elekshon MLA 2028. Kumta ka dei ka rai kaba la shim da ki MLA shimet. Kam dei ba ngi thmu ban pynduh jait iaki MLA ne iaki paralok sengsain pyrthei kiba ïatreilang. Kane ka jingwan iasoh ka dei hi baki rai shimet bad ngi kum ka seng saiñpyrthei ngi kwah ban pynkhlain ïalade. Ngi kwah ruh ban ïohi ba ka Party kan nangroi na ka por shaka por” u la ong.
“Kumta da kaba buh ha ka jingmut ia kine kiei kiei baroh, ngi sngewkmen mynta ka sngi ba ki la nang bun ki MLA kiba la iasoh bad ngi bad kane ka pynkhlain ia ka party bad kumjuh ka pynkhlain ia ka sorkar bad kumjuh ruh ka ai jingkyrmen kaba skhem ia ki paidbah ka jylla” u la bynrap.
U Myntri Rangbah u la ong ba ka jingskhem ka Party ha ka sain pyrthei ka long kaba kongsan na ka bynta ka jingsynshar kaba bha bad kaba skhem.
“Ha kaba kut ngi hap ban kynmaw ba ka jingskhem jong ka Party ha ka saiñ hima sima ka long kaba donkam eh na ka bynta ka jingsynshar kaba bha khamtam ban ioh iaka bor ban ban shim rai haba iadei bad polisi. Hooid ki ilekshon ki don, ngim tip, ki ilekshon ki lah ban long kiba eh bha hynrei kadei ban dei ka khubor kaba bha. Ngan pynthikna ia baroh ki nongshong shnong bad kumjuh ruh ia ki MLA kiba la iasoh bad ngi bad ki MLA kiba don ryngkat bad ngi ba ngi iai bteng ban trei ha ka rukom kaba skhem bad kaba aiti lut. Ngin iai buh ia ka jingmyntoi jong ka jylla bad ki briew jong ngi ha khmat” ula ong.
