Shillong, Risaw 15: U Myntri Rangbah ka jylla u Conrad K Sangma hynne ka sngi saitjain ula buh ia u mawnongrim ban tei iaka Indoor Stadium kaba kot T.8.7 klur tyngka ha Lawsohtun.
Commend the efforts of Hon’ble Minister and MLA of the area, Sh. @HamDohling for the all the work he has been doing in his constituency for the benifit of the people and for the development of the area. pic.twitter.com/OXiJgZzMvI
— Conrad Sangma (@SangmaConrad) October 15, 2022
Ia une u mawnongrim la buh ha ka jingiadonlang u Myntri ka tnad C&RD Bah Hamletson Dohling, ki ophisar naka tnad Sports & Youth Affairs, PHE, PWD bad ki nongshong shnong ka Lawsohtun.
Haba kren ha ka jingialang u Conrad ula ong, ba u MLA ka thaiñ Bah Hamletson Dohling ula trei shitom ym tang naka bynta ki paidbah jong ka Mylliem constituency hynrei u la noh synniang shi katdei naka bynta ki paidbah jong ka jylla.
“Ka jingbuh mawnongrim ban tei iaka Indoor Stadium ha Lawsohtun kadei ka jingdawa kaba la sahteng bad kane ka projek kadei kaba la buh hakhmat eh da u Bah Hamletson… kane ka projek kan long ka jingkyrkhu naka bynta ki paidbah khamtam eh ia ki samla” ong u Conrad.
U la iathuh baka sorkar kala mang T. 8.7 Klur na ka bynta kane ka projek bad 50% jong ka jinglut jingsep yn bei da ka Khelo India katba ka 50% kaba sah yn pynlut da ka sorkar jylla.
U Myntri Rangbah ula khmih lynti ba shen yn sa sdang noh ban tei ia kane ka jaka ialehkai khnang ba yn lah ban ai jinghikai iaki khynnah bad ki samla ha ki jingialehkai bapher bapher bad kan long ruh kum ka rynsan na ka bynta ki nongialehkai ban pyni iala ka sap ka phong.
“Ia ka Meghalaya Games ym shim la lah ban pynurlong ha ki 17 snem kiba la dep, hynrei ka sorkar jylla kaba mynta, kala pynlong arsien ia kane ka lympung iakob ialehkai bad shen kan sa pynlong iaka Northeast Olympics ha kaba ki samla kin ioh iaka lad ban sei iala ki sap ki phong haka kam ialehkai” ong u Myntri Rangbah.
Ula ong, ka sorkar jylla kala ai iaki khusnam haka dur jong ka jingai jingiarap pisa ia ki nongialeh kai kiba la wanrah ia ka nam ka burom iaka jylla da kaba trei shitom bad hikai hi dalade bad pynlut pynsep hi na la ka jong ka pla wat la kim shim la ioh pat ia kano kano ka jingithuh.
Ula ong ba ka sorkar jylla kala pynmih ruh ia ki prokram bad projek bapher bapher ban kyrshan ia ki nongialehkai bad ban pynbiang ruh iaki jaka ialehkai khang ba kin ioh ban kilan met ban long ki nongialehkai kiba tbit bad kiba pawnam.
“Ka jingangnud ka jong nga ka long ban iohi ba ha ki snem ban wan, ngi dei ban pynmih iaki nongialehkai kiba lah ban khur iaki takma haka National Games, Olympic ne Commonwealth Games” ong u Conrad Sangma.
Na ka liang u Bah Hamletson Dohling ula ong, ba kane ka sngi kan long ka sngi kaban sah jing kynmaw iaka shnong Lawsohtun namar ba kadei ka jingangnud kaba la slem jong ki paidbah khamtam eh ki samla ban ioh iaka jaka ialehkai kaba biang.
U la ong, ki nongshong shnong ha Lawsohtun kiba bun tam kidei ki samla bad daka jingdon jong ka indoor stadium, kan long ka jingkyrkhu iaki khamtam ia ki samla ba kin ioh ban saiñdur bad pyntbit ialade ha ki jingialehkai ki bapher bad ban ioh ruh iaka lad ban wanrah nam iaka jylla bad iaka ri hi baroh kawei lyngba ka kam ialehkai.
