Shillong, Risaw 29: Ka East Garo Hills ka la rakhe ia ka jingdap 50 snem lane ka Golden Jubilee ha Rongrenggre Government Higher Secondary School, ha kaba u Myntri Rangbah ka jylla u Conrad K Sangma u la plie bad buh ia ki maw nongrim jong ki kam pynroi kiba shongdor palat T.53 klur.
“Ka Jubili Ksiar ka ai ka mat kaba biang ban pyniasoh ia ka jingdap 50 snem jong ka Williamnagar bad ka jingroi jong ka ba la kyrshan da ki kam pynroi kiba kham khlain, ki jingtei iaki jait jingtei kiba jingdonkam naka bynta ki paidbah kiba long kum ki lad ki lynti kiba kham bha na ka bynta ki nongshong shnong jong ka” la ong u Conrad.
U Conrad ula ong ba ka prokram ka pyni ia ka jingroi jong ka Williamnagar kum ka jaka ba kongsan ha ka liang ka synshar khadar, ka pule puthi bad ka ioh ka kot bad ka wanrah lang ia ki jingkyrshan haka liang ka pule puthi, ka Sport bad ki surok naka bynta ki nong shong shnong.
U myntri rangbah u la pynkynmaw ba ia ka Simsanggre Civil Sub-Division la seng ha ka 26 tarik Kyllalyngkot 1972 ban shakri ia ka jaka ba kyndong, ha kaba ia ka Williamnagar la ai kyrteng haka kyrteng u Captain Williamson A Sangma na ka bynta ka bynta jong u ha ka jingiaid lynti jong ka Meghalaya ban ioh Jylla ba pura bad la kyntiew kyrdan ia ka sha ka East Garo Hills District headquarter haka 29 tarik Risaw 1976.
Haba ai khublei ïa ki Nokmas kiba la ai sngewbha ïa ki jaka na ka bynta ki ophis jong ka district bad iaki rangbah kiba la kyrshan ïa kane ka iaka nongbah District, u Conrad u la ong ba ka jingnoh synñiang jong ki ka la thaw ïa ka nongrim ha kaba ka shnong ka la kiew kum ka jaka shakri iaki paidbah ha East Garo Hills.
U la ong ba ka jingplie ia ka Williamnagar Higher Secondary School bad ka jingjurip ia ka Multi-Purpose Indoor Sports Hall kaba T.9.40 klur kan pynkhlain ia ka jinghikai kaba bha bad ka jingpynroi ia ki jait jingialehkai jong ki samla, katba ki projek surok bad jingkieng kin pynbha iaka iaid ka ieng bad ka jingpyniasoh bad ki jaka ba marjan.
“Ki projek surok bad jingkieng ki pyniasoh bad kin kyrshan ia ka jingroi bad jingkiew ha East Garo Hills,” u la ong.
Napdeng ki projek ba la plie ki long ka jingpynheh ia ki surok hapoh jong ka MITP kaba 13.989 km ha ka jinglut T.26.92 klur, ka jingpynheh ia ka surok Rongrenggre-Simsanggre-Nengkhra 6 km kaba T.15.98 klur, 4.40 km interlocking block roads haka jinglut kaba T.4.70 klur, Ka jingplie maw nongrim iaka Jingkieng ha Rongongre, 8 Unit MIG housing T.3.61 klur bad ka Commandant’s Office jong ka 5th Battalion ha Samanda haka jinglut kaba T.2.63 klur,
Ha kane ka jingrakhe la wan ïashim bynta da u Myntri ka tnat PHE uba dei ruh u MLA ka Williamnagar u Marcuise N Marak, u Deputy Commissioner, u SP, ki MDC, ki Nokma bad ki samla pule, ha ryngkat ka jingai khublei ïa ki MLA barim, ki MDC bad ki riew pawkhmat bad la sam ïa ki syrnot MSSDS, ki tiar ban sdang iaki kam lajong, ki tiar MOTHER Kits hapoh ka Scheme CM Safe Motherhood.
