Shillong, Risaw 29 : U MLA ka Nongpoh Bah Mayralborn Syiem ha ka sngi Palei ula pynpaw ia ka jingsngew skhem ba ka Bharatiya Janata Party kan pynurlong ia ki mat jingdawa kiba la sahteng la slem ka Meghalaya haba ban jur ba ka rai jong ki 8 ngut ki MLA ka UDP ban iasoh sha ka BJP ka dei kaba la pynshong nongrim halor ki mat jingdawa ki ban pynurlong hashuwa ka elekshon 2028.
Ki jingdawa ki kynthup ia ka jingweng noh ia ka hukum khang tih dewiong, ai jingmynjur ia ka Meghalaya Resident Safety and Security Amendment Bill 2020, pynrung ia ka ktien Khasi ha ka Khyrnit ba Phra, pynkynriah ia ka Them Metor bad ka kam ba iadei bad ka Foreign Contribution Regulation Act.
Haba jubab ia ka jingkylli la u shaniah ia ka jingkular ba hashuwa jong ka BJP ban weng ia ka hukum khang tih dewiong hapoh 180 sngi bad shano kin leit lada ki jingdawa kim urlong, u Bah Mayral ula ong “Kane ka jingkren kala mih hashuwa ka elekshon 2023. Ngam dei satia uba iakren bad ki nong ialam ka BJP ha u 2023. Mynta ba ngi la don bynta, Nga sngew skhem bha ba kin sa pynurlong ia kine ki jingdawa haba buh hakhmat ia ka rukom long ka sain pyrthei ha ka thain Shatei Lam Mihngi” ula ong.
“Lada ym lah pynurlong, ngin sa shim ia ka rai ha ka por kaba biang. Ka por kan sa batai. Ha ka sain pyrthei ka don beit ka lynti ban leit. Kam don jingeh satia shano ban leit” bynrap u bah Mayral.
Halor ki daw ba leit iasoh BJP, u Bah Mayral ula ong ba ka rai ka long ban kyntur ia ki san tylli ki mat jingdawa kiba la sahteng la slem.
“Ban iasoh bad kawei na ki seng sain pyrthei kaba heh duh ha ka pyrthei ka dei haba buh ha ka jingmut jingpyrkhat ia ki mat jingdawa jong ka Jylla kiba la sahteng la bun bun snem” ula ong.
Haba batai ia ki, ula ong “Kaba nyngkong, pynrung ia ka ktien Khasi bad Garo. Ngi la mynjur ia ka resolution ha ka 27 tarik Nailur 2018, hynrei ym shym la jia eiei la phra snem. Kaba ar, ka amendment jong ka Foreign Contribution Regulation Act Bill 2026 kaba ktah ia ki seng niam, ki society, ki seng trei monsngewbha kiba ap ia ka synniang pisa nabar ri. Kaba lai, ban pynsuk bad weng ia ka jingkhang tih dewiong. Kaba saw, pynphai sted noh ia ka Meghalaya Residents Safety and Security Amendment Bill 2020 bad kaba san ka long ban pynkynriah ia ka Them Metor na Them Iew Mawlong”.
“Tang ka Sorkar Pdeng, ka Sorkar NDA ba ialam ka BJP, kaba lah ban leh eiei ia kine. Ngi kum ka kynhun ba phra ngut ngi sngew ba to ngin prat ia ka lynti khnang ba yn lah pynurlong noh ia kine ki jingdawa hapoh ka por kaba biang. Kane ka dei ka nongrim ba iasoh BJP. Ngim don eiei pyrshah ia ka UDP lane ki nongialam” ula ong.
Haba kyntait ba ka FCRA ka dei kaba long pyrshah ia ki khristan, u Bah Mayral ula ong “Mano ba ong ia phi?, Pynshisha ia ka, pyni ia nga ia ka kyndon kaba long pyrshah ia ki Khristan. Ka jingpyn thymmai ia ka FCRA certificate manla u snem kam dei kaba long pyrshah Khristan, ka long kaba hap ba leh, ka dei shaphang ka jingai jingkhein”.
Ula ong ba ka jingdawa ka long ba ka jingpynthymmai ia ka syrnot ka dei ban long nangne shakhmat bad kaba kham suk.
“Naduh mynta lada pyntreikam ia ka, dei ban long nangne shakhmat. Kaei ka jingleh bakla haba pyntymmai ia ka FCRA manla u snem? Mynta ki seng kin hap leit sha Delhi ban pyntymmai. Lah ban kham pynsuk, leh online, buh ia ka cell ha Guwahati ban pynsuk ia ki briew jong ka Jylla. Kane ka dei kaba ngi iakhun kum ka kynhun na ka bynta ki paid Khristan” ula ong.
“Kum u khristan ba shisha bad u riewngeit, Nga don ia ka jingngeit kaba pura ba da ka jingiadon hapoh ka BJP ngi lah ban iakhun kham bun bad iada ia ki paid khristan” ula bynrap.
