Shillong, Risaw 29 : U Symbud Myntri Rangbah Bah Sniawbhalang Dhar ula pynpaw ba ka project ban pynheh ia ka Shillong Airport ha Umroi kan wanrah ia shibun bah ki jingkylla ia ka Jylla, bad pyntip ba kane ka project ka lah ban aikam ia kumba 20,000 ngut ki samla.
U Bah Sniawbha ula ong ba ka jingpynheh kan pynmyntoi shibun eh ym tang ka jingpynkhlain ia ka lad pyniasoh na suin. Ka lah ban kyntiew ia ka kam jngohkai, plie ia ka lad sengkam bad iarap ban pynpoi ia ki mar ba pynmih na Jylla sha ki iew ka pyrthei.
“Shisien ba ka Umroi Airport kala long kaba la bit ban hiar ki liengsuin kiba heh, Nga iathuh ia phi, kan wanrah shibun bah ki jingkylla ia ka Jylla Meghalaya baroh kawei” ong u Bah Sniawbha.
Haba ban jur ia ka lad ban kyntiew ia ki kam jngohkai, ula kyntu ia ki kynhun bapher bapher ban ym pynkut ia ka jingphai khmat tang sha ka jingpyniaid iew ia ki mar ba pynmih na Jylla hynrei ban peit sha ki kabu kaba ka Jylla kan ioh na ka jing biang ka lad pyniasoh na suin.
“Wat kren halor ka jingdie ia ki mar ba phi pynmih, sngew kren halor ka jingwan ki kam jngohkai. Bad duna eh kumba 20,000 ngut kin ioh kam na kane ka project” ula ong.
