Shillong, Risaw 28: U Myntri Rangbah ka Jylla u Conrad K Sangma bad ka Chief Justice ka High Court of Meghalaya Justice Revati Mohite Dere, ha ka sngi Ba-ar, kila buh ia u mawnongrim ban tei ia ka National Law University, Meghalaya bad ia ka Meghalaya State Judicial Academy.
Ha kane ka jingialang la iadonlang u Myntri ka tnad aiñ u Bah Lahkmen Rymbui, ki Nongbishar jong ka High Court ka Meghalaya kiba kynthup ia u Justice HS Thangkhiew, u Justice W Diengdoh, Justice B Bhattacharjee, u Justice, Sanjib Banerjee u Chief Justice barim jongka High Court ka Meghalaya, Prof Dr Jyoti Jajodia Mozika, VC, NLU Meghalaya bad ka Kong Kerpa Lyngdoh Nongbri, ka Director jongka MSJA.
Haba kren ha ka jingialang u Conrad K Sangma, ula ong ba u mawnongrim u long kum ka dak jong ka jingiaid shakhmat jong ka National Law University ka Meghalaya bad ka Meghalaya State Judicial Academy na ka jaka kaba shipor sha ka jaka kaba pura ha Mawpdang–Mawkhanu, New Shillong Township.
“Ka Sorkar Jylla kala dep ban aiti ia ka jaka kaba 65 akar na ka bynta kine ki ar tylli ki jaka pule ha ka 30 tarik u Risaw 2023 bad kane ka jaka pule kaba pura kan don ia ka jaka kaba kyrpang ha kaba iadei bad ka jingpule ia ka aiñ, jingwad bniah, jingioh jinghikai ha ka kam aiñ, library, ki kor digital bad ki jingiakren bad ki riewstad” ula ong bad ka bynrap ba kine ki artylli ki jaka pule kin ai jingshakri ha ki rynsan bapher hynrei ha ka lynti iaid kaba kumjuh pat.
“Ka University kan pynkhreh ia ka lawei ha kaba iadei bad ki nongsaid aiñ bad ka Academy kan ai ia ka jinghikai na ka bynta ki Judicial Officer kiba ai jingshakri” ula bynrap.
Haba pynpaw halor ka jingiohi jngai ban wanrah biang ia ka nam bad burom jong ka Jylla kum ka shlem jong ka jaka pule bad ban pynkylla ia ka Jylla sha ka shlem jong ka pule puthi bad ka ioh ka kot lyngba ki jingkynshew pisa kiba biang bad ki karkhana kiban ai jingshakri ia ka Meghalaya, u Myntri Rangbah ula ong, ka Meghalaya ka don bun tylli ki National Institution bad ong, “Ka NLU Meghalaya kala bynrap shuh shuh ia ka aiñ sha katei ka thup kum ka jingdon ia ki jaka pule ha ka technology, management, design bad medicine bad pyniar ia ka lad kiba don ia ki samla ka jylla ba kin ioh ban jied”.
Ha kaba iadei bad ka kamram jong ka NLU bad ka MSJA, u Myntri Rangbah ula ong “Ka kamram ba kyrpang ka jongki kadei ban kynthup ia ka jingwad bniah ne Research halor ka riti ka dustur, ki ain bad ki jingleh jong ki jaidbynriew riewlum, ki Legal Aid Clinic bad ka State Legal Services Authority, Moot Courts, ka jingiadonbynta bad ki iingkashari, ki nongiasaid aiñ bad ka imlang sahlang” ula ong, bad ka Academy kadei ban ai ia ki jinghikai kiba ryntih bad kiba iai bteng ia ki Judicial Officer, da kaba pynleit jingmut ha ka jinglong hok bad ka jingiengskhem ha ka nongrim, ka rukom iatai halor ki aiñ ki kanun, ki aiñ thymmai halor ki kam bymman, ka rukom pyniaid ia ki iingkashari bad ki kor teknoloji.
Katba ka Chief Justice ka Revati Mohite Dere, kala ong ba kane ka jingialang ka long kum ka jingshim ia ka sienjam ban iaid na ka jaka treikam kaba shipor sha ka jaka kaba pura kaban kyntiew ia ka jingpule ha ka aiñ bad ka Judicial Training.
Kala pynpaw ba kumno kane ka university bad ka academy kila ai ka jingshakri kaba biang ha kaban ai ia ka jingbishar kaba hok. “Ka university kan pynkhreh ia ki nongiasaid aiñ kiba tbit, katba ka academy kan pynleit jingmut ha kaban pynkhlain ia ka sap bad ia ka jingstad jong ki briew kiban khmih ia ka aiñ”.
