Shillong, Risaw 28 : Ka Meghalaya kan sa ioh ia ka jingkyrshan kaba khraw ha ka jingialehkai phutbol ba kynsai da ka jingshim rai ka Kynhun Myntri ha ka sngi Ba-ar, kaba ai jingmynjur ia ka jingtyrwa ban aiwai ia ka jaka ba jan kot 20 acre ha Mawkhanu, New Shillong, sha ka NorthEast United FC.
Ia kane ka jaka ba don haduh 19.99 acre, yn aiwai haduh 45 snem sha ka NEUFC ba kan buh ia ka Football Academy.
U Myntri Rangbah Conrad K Sangma, uba pyniaid ia ka jingialang jong ka Kynhun Myntri, ula sam ia kane ka jingtip lyngba ka X bad iathuh ba ia kane ka Academy yn sa tei da ka jingkynshew ba kot kumba T.40 haduh T.50 klur.
Kane ka Academy kan don ia lai tylli ki madan ialehkai phutbol, ki jaka sah ia ki rang ialehkai bad kiwei ki jingtei kiba thmu ban saindur ia ka sap ialehkai ka Jylla bad ban ai jinghikai ia ki samla ba kin lah iakhun ha ki jingialehkai jong ki kyrdan kiba halor.
U Conrad ula ong ba kane ka sienjam kan iahap bha bad ka prokram Mission Football jong ka Jylla.
“Katba ngi dang pynbteng ban pynkhlain ia ka jingialehkai phutbol ha ki shnong ki thaw bad kyrshan ia ki club ka jylla, kane ka sienjam kan iarap ban pynduna ia ka jingiapher hapdeng ka jingpynroi ia ka phutbol ha ki shnong ki thaw bad ka jingialehkai phutbok ba kynsai” ula ong.
