Shillong, Risaw 26 : U President ka Congress Bah Vincent H Pala ha ka sngi Nyngkong ula pynman ia u Myntri barim Bah Paul Lyngdoh kum u ‘Sing ba mynsaw’ hadien ka jingkynthih na ka United Democratic Party (UDP) sha ka National Peoples’ Party (NPP), bad ong ba ki MLA ba leit iasoh BJP kila leh ia kane da ka jingshaniah ha ki jingkular kiba katei ka party kam ju pynurlong.
Halor ka jingphet seng ba dang shen ki 11 ngut ki MLA ka UDP- 3 sha ka NPP bad 8 sha ka BJP, u Bah Pala ula ong “Kiba bun kila leit iasoh sha ka BJP namar ka jingphohsniew bad jingkyrmen kumba nga ong ha phi hynrei, Ngam ju iohi ha ka BJP ba kin bat iala ka kular bad ki jingkyrmen. Nga thikna ba hapoh u 2028 ki paidbah kin ai ia kata ka jingkyrmen sha ki MLA”.
U ong “3 ngut na ki, kila iasoh sha ka NPP bad phi iatip bha ba na kine ki laingut, u Bah Paul u dei u Myntri bad nga ju ong ba u Bah Paul u dei u Sing ba mynsaw hadien ba ula shah siat hala ka jong ka party haba sdang da u khnam bad ryntieh bad hadien ula pyniasoh sha ka UDP hapoh ka bom bad ula treikam bha hynrei sa shisien ula shah siat bad ula dei u sing ba mynsaw, kumta to ngin peit kumno une u sing yn leh ha ka NPP, Nga khlieh lynti ba un treikam bha, un long Myntri ne em, ia kata ngin sa iohi”.
U Bah Pala ula bynrap “Hynrei lada ki jingkular kim don Nga tharai kin sa iaid ha kajuh ka lynti kumba nga ong ia ki MLA ka TMC kiba la leit iasoh da ka jingkyrmen kaba khraw hynrei haba kut, ym don uwei ruh uban wanphai pat lait noh tang uwei lane arngut, kajuh kan sa jia ia ki MLA ka UDP”.
