Shillong, Risaw 19: U Lamphang ka ïingdorbar thawaiñ ka jylla u Thomas A Sangma hynne ka sngi Nyngkong, ula ong ba un dang khmih bniah ia ka aplikeshon ba pyniasoh ki 3 ngut ki MLA ka UDP sha ka seng NPP.
U Sangma ula ong, ba ia katei ka aplikeshon la aiti da u Bah Paul Lyngdoh, Bah Renikton Lyngdoh Tongkhar bad u Bah Nujorki Sungoh ryngkat bad ka jingshim rai jong ka seng.
“Nga lah ioh ia ka aplikeshon jong ka jingpyniasoh. Namar ba kila wan ban aiti dalade shimet ia nga. Nga lah pdiang ia katei hynrei ngam pat ai ia kano kano ka jubab haduh mynta namar ba nga dang donkam ban pan jingmut shwa” ula ong.
Ula pynshai ba kane kam dei satia tang ka jingpyndep rukom.
“Bun kin pyrkhat namar ba nga lah dep ban ai jingithuh ia ka jingpyniasoh ki 8 ngut ki MLA kham hashwa, kumta kane ka lah ban dei tang ka jingpyndep rukom. Kam long satia kumtei. Nga hap ban bud ia ki kyndon bad ia ka rukom treikam. Nga lah dep pyntip ia ki ba ngan hap khmih bniah shwa bad ngan sa pyntip ia ki ha kine ki khyndiat sngi” la ong u Lamphang.
Ha kaba iadei bad ka nombar, ula ong “Ha ka rukom kheiñ kala long palat ia ka ‘Two Third’ hynrei kam long kaba suk pat haduh katta katta. Nga hap ban pan jingmut na kiba shemphang ia ka aiñ bad ngan sa ai ia ka rai ha ki sngi ban wan”.
U Sangma ula ong, ba ula iakynduh tang ia arngut ki MLA ha ka sngi Nyngkong.
“Na ki 3 ngut ki dkhot, tang arngut kila wan mih hakhmat ka jong nga mynta ka sngi. U Bah Nujorki Sungoh u leit shabar ban ioh jingsumar. Kumba la leh ha ki por kiba lah dep, nga hap ban pynthikna dalade hi na baroh ki dkhot la ki lah mynjur shisha da ka mon kaba laitluid ka jongki. Nga hap ban ap ia katei” ula ong.
Haba kylli ia katei ka jingpynshisha lah ban leh ‘Online’ ula ong, “Ki lah ban don ki lad. Mynta ka por, ki nongiasaid aiñ ruh ki lah ban iasaid da kaba leh Online wat hapoh ka Supreme Court bad High Court. La nga lah ne em ban pynshisha ia katei ka jingmynjur ka jongu ban pyniasoh ne donkam beit ban phah wan ban mihkhmat beit dalade, nga hap ban twad jingmut na kiba shemphang ia ka aiñ halor katei”.
“Nga dang hap ban khmih bniah” ula bynrap.
