Shillong, Risaw 18: Kawei ka jingjia ia kaba la suba ba dei ka jingshah kawang petrol bom kala jia ha Mawbah, Mawprem, hajan ka Shiv Mandir, ha ka por kumba 9.30 baje mynstep jong ka sngi saitjaiñ, bad ha kane ka jingjia kawei ka scooty ba la shu iehnoh ka la ing.
Katkum ka jingiathuh jong ki nongsakhi, ki la iohsngew ia ka jingsawa kaba jur shabar bad hadien ki la iohi ia u petrol bomb u la hap hajan kawei ka scooty bad kawei ka jaka die momo khlem da bthei. Ki la iathuh ruh ba ki la iohi ia u wire uba la kem ding.
Donbok ba ym shym la don ba mynsaw.
U Superintendent of Police ka East Khasi Hills Bah Vivek Syiem ula iathuh ba ki pulit kila ioh jingtip ha kaba iadei bad kane ka jingjia bad kila sdang ban tohkit ia kaei kaba jia.
Haba kylli hato ka dei ka jingsuba petrol bom, u bah Syiem u la ong ba ki Pulit ki dang pynshisha ia kane ka kam.
“Ngi dang pyrshang ban pynthikna ia ki jingshisha”, la ong u SP.
Ki pulit ki la leit mar mar sha katei ka jaka bad ki la sdang ia ka jingtohkit ban lap ia kiba donkti.
