Kiphire, Risaw 14: Ym duna ia 24 tylli ki iing ki la shah thang ha ka shnong Pokphur bad Longtsunger kiba hap hapoh ka Kiusam Circle ka Jylla Nagaland Kiphire district bad kane ka la pynlong ia 157 ngut ki briew kylla phetwir namar ka jingiakynad pher jaidbynriew kaba dang iai bteng haduh mynta.
Ki bor district kiba dang peit bniah ia ka jinglong jingman ka la lap ia ka jingshah pynjulor kaba jur ia ki iing ki sem hadien ka jingsdang jong ka jingiakynad.
Katto katne kiwei pat ki jingdon jingem ki la shah pynjulor, ha kaba ki nongshong shnong jong ka shnong Thulun ki dei napdeng kiba la hap ban phet noh na ki ïing ki sem jong ki.
Ha ka shnong Pokphur, 12 tylli ki iing ki la shah thang, katba 5 tylli kiwei pat ki la julor malum mala bad kawei ka arshaka kala shah thang.
Kane ka jingjia ka la pynkylla phetwir ia 60 ngut ki briew.
Ha ka shnong Longtsunger, 11 tylli ki ïing ki la shah thang bad kawei pat ka la shah pynjulor, ha kaba 83 ngut ki nongshong shnong ki la hap ban phet rieh. Ha kajuh ka por, 14 ngut ki briew na ka shnong Thulun ruh ki la shah pynkylla phetwir haduh ka 14 tarik Risaw.
Ia kane ka jingpeit bniah la leh da Additional Deputy Commissioner jong ka Kiphire Headquarter u Longdiba L Sangtam, NCS ryngkat bad ki heh ophisar kiba dei peit, ban tip ia ka jingshah pynjulor bad ban tip ia ka jingdon jong ki nongshong shnong kiba shah ktah.
U Deputy Commissioner u Temsuwati Longkumer, NCS, bad u Superintendent of Police u China Chakhesang, NPS, ki la hiar sha ki shnong kiba la shah ktah ha ka 13 tarik Risaw ban bishar bniah ïa ka jinglong jingman ha ki jaka.
Ban iada na ka jingjur shuh shuh ka jingiakynad bad ban pynneh pynsah ia ka suk ka sain, la buh ia ki pulit IR ha Kiusam bad ha ki shnong kata ha Longtsunger bad Pokphur.
Ki lad ai jingiarap ruh ki dang iaid shakhmat ban iarap ia kito kiba la shah pynkylla phetwir namar ka jingiakynad.
Ki bor synshar district ka la batai ba ka jinglong jingman ka long kaba sngewtieng hynrei ki bor pahara ki dang bteng ban don haki jaka ban ai jingshngain iaki paidbah.
