Shillong, Risaw 8: U Secretary ka tnad Food and Public Distribution ka sorkar India Sanjeev Chopra mynta ka sngi ka 8 tarik u Risaw, u la plie paidbah ïa ka Command and Control Centre, kaba hap hapoh ka tnad Food Civil Supplies & Consumers Affair ka sorkar jylla.
Ïa kane ka Command and Control Centre, la buh hapoh ka ophis trei kam jong ka tnad Food Civil Supplies & Consumers Affair ha Horse Shoe building, Shillong.
Ka thong ba ha khmat eh ba plie ïa kane ka jaka ka long ban buddien ïa ki trok kit khaw lyngba ka GPS bad ka Mobile Apps la ki poi ne em sha ki jaka ba ki thmu ban leit.
Haba kren sha ki lad pathai khubor u Chopra u la ong, Nga la wan sha Shillong sha ka Conference ki Secretary jong ka Jylla Shatei Lam Mihngi kum shi bynta jong ka jingwan jngoh hynrei nga sngewkmen ban wan hangne mynta ka sngi ban plie ïa ka rukom buddien ïa ki kali kaba la buh da ka sorkar Meghalaya .
“Baroh ki trok bad ki kali kiba kit ïa u khaw na ka Diphu sha ki fair price shop la bud dien da u GPS Devise uba yn pyndait ha ki trok, khnang ba ki briew kiba pyniaid ïa ka Command bad Control Centre kin lah ban bud dien ïa ka jingiaid jong ka kali ban iohi” u la ong.
Ki jingtip ba ngi ioh ka long ba ki don ki trok kim leit beit beit sha ki fair price shop ne ki dukan ai ration ne hapdeng lynti ki don ka jingleh tuh kiba jia bad mynta baroh la lah ban buddien mynta bad ki heh ophhisar ki lap mar mar kin pynshitom lada lap ba ka draibar u leh bakla, ong u Chopra.
Kane kadei ka jingthmu kaba khraw jong ka sorkar bad nga thikna ba kane kan iarap ïa ka PSD system ha ka jylla bad kane kan iarap ruh ïa ki nongioh jingmyntoi ban ioh ha ka por ka ba biang, u la ong.
