Shillong, Risaw 08 : Ka Sorkar Jylla kala trei borbah ban ratdyngkhong ia u droks da ki artylli ki buit ban pynkut ia ka jingpynpoi droks bad ai jingsumar ia ki nongdih, ong u Symbud Myntri Rangbah ba khmih ia ka kam Pohiing (Police) Bah Prestone Tynsong ha ka sngi Palei, haba pynksan ia ka jingpynkyn riah kam ia u SP ka Anti Narcotics Task Force (ANTF).
Haba kubur ba ki jingjia kam bymman na u droks ki dang bteng, u Bah Prestone ula ong ba ka Sorkar kala wanrah ia ki lyntri treikam hadien ka jingpynsdang ia ka mishon.
“Ki jingjia ki dang iai jia khlem artatien hynrei ngi la buh ia kawei ka Mission bala khlieh da u Bah Francis Kharshiing, ngi la dep thaw ia ka kynhun kaba khlain bad ki Tnad bapher bapher kum ka Tnad Social Welfare bad kiwei ki Tnad bad mynta kila iatrei ia ka kam” ula ong.
Haba kdew ia ki jingeh, ula ong “Haba iakren halor u droks, ki don ar bynta kiei kiei. Kawei ka long ban ithuh bad pynkut ia ka jingwan pynpoi droks bad kaba ar ka long ban iarap ai jingsumar ia ki nongduh”.
“Ngi la phah ia ki sha ki rehabilitation centre bad ai ka jingiasyllok bad khatduh ka shim bun ka por ia ki wat ba kin koit” ula bynrap.
U bah Prestone u iathuh ba ki Pulit kila thaw ia ka ANTF Unit ka ban peit ia ki kam ba iadei bad u droks.
Ula ong ban tehlakam ia kane ka jingeh ka donkam ia ka jingiatreilang bad ki Jylla ba marjan bad ba shajngai namar ia u droks lah khaii na shiliang u pud u sam.
“Ngi donkam ban don ka jingiasngewthuh jingmut bad ki Jylla ba marjan namar ka Meghalaya kan ym lah ban leh ne khang ia ka jingpyniaid lynti ia u droks na kawei ka Jylla sha kawei pat bad wat na shabar ka ri India ruh” ong u bah Prestone.
Haba khot ia ka jingiatreilang ka imlang sahlang, u Bah Prestone ula ong “Ngi donkam ruh ban iashim bynta ha kane naduh ki kmie kpa, ki khynnah bad ka shnong ka thaw bad wat ka Sorkar, ngi donkam ban don ka jingiatreilang ba iajan hapdeng jong ngi”.
Ula kyntu ia ki nongshongshnong ban long kiba husiar bad pyntip sha ki bahaiing hasem ne ki marjan marpa haba ki mih na iing ha ka por mynmiet.
Haba iada ia ka jingpynkynriah ia u SP ka ANTF, u Bah Prestone ula ong ba ia kane laleh kat kum ki lynti kiba dei bad kan ym ktah ia ka jingkhynra pyrshah ia u droks.
Defending the transfer of the SP of ANTF, Tynsong said it was done as per due process and will not hamper anti-drug operations.
