Shillong, Risaw 8: U Symbud Myntri Rangbah ka Jylla bad National Vice President ka NPP u Bah Sniawbhalang Dhar ha ka sngi Palei, ula kyntait ia ki jingkynnoh ba bun ngut ki MLA ka NPP kynthup kiba na Garo Hills, ki thmu ban pyniasoh noh bad ka BJP.
Haba kynthoh tyngeh ia ka jingkam u Nongialam ka BJP u Bah A L Hek, u Bah Sniawbhalang Dhar ula ong, ba ka NPP ka iengtylli kawei bad kum kitei ki jingkam kin dei kiba shuh shah kheinkai ha ki paitbah.
“Kam don kano kano ka jingiapher namar baroh ki seng sain pyrthei ki kwah ban pynkhlain ialade. Ban shu kam ka long kaba suk hynrei ban shim ia ki, kin ym lah” ong u Bah Dhar.
Haba kynthoh ia ka BJP, ula ong, “Lada phi kam jubor, phin shah rkhie bein ha ki paitbah. Nuksa, lada phi kam ia ka lok jong kiwei, kumno phin sngew. Ngam kwah ban kren eiei halor kiwei pat ki seng”.
U Bah Dhar ula banjur ba kam don kano kano ka jingiapher jingmut hapoh jongka NPP.
“Ka NPP kadei ka seng kaba iatylli. Ka jingkam u Bah Hek ba ki don katne ki (MLA), ngam tip eiei. Ngi kum ka NPP bad ki 33 ngut ki MLA, ngi long kiba iatylli pura” ula ong.
U Bah Hek dang shen ula kam ba katto katne ki MLA ka NPP khamtam na Garo Hills, kila iakren bad ka BJP bad pynpaw ia ka jingkloi ban pyniasoh bad ka seng hashwa ka elekshon MLA ha u snem 2028.
