Shillong, Risaw 01 : U Superintendent of Police ka East Khasi Hills Bah Vivek Syiem ula hukum ban pynlong ia ka jingtohkit kaba bniah ia ka jingkynnoh lum pisa be-ain ki Pulit na ki trok ha surok National Highway ha Mawkhanu bad Thangshalai, kaba la ioh ring video da ka Khasi Students Union (KSU).
Ki nongniah trok naduh kiba kit marbam, kit marpoh khyndew bad kiwei kiwei, ki hap ban siew haduh T.200 haduh T.500 kawei ka trok ha ka sem bala shna da ki Pulit ha kine ki artylli ki jaka.
Haba kynthoh halor ki video bala pynsaphriang paidbah ha ki social media, u Bah Vivek ula ong ha ka sngi Palei “Hynnin ka sngi mar syn ioh jingtip shaphang kine ki video ha social media ba ka don ka jingleit talasi ka KSU bad ba kila kynnoh ba ka don ka jinglum pisa beain, Nga la phah mar mar ia u SP (City) Bah Dangsan Khyriem bad ula sdang pynlong ia ka jingtohkit”.
U iathuh ba ki constable kila buh ha kine ki sem ha ka jingshisha ki dei na ka bynta ban iaid pahara bad ban pynthikna ia ka jingshngain ki trok naduh janmiet haduh da miet, hadien ka jingkyrpad na ki truck association halor ka jingjia kam lute man ka por.
Hynrei, une u Heh Pulit ula kubur ba don ka jinglehtam.
“Da kaba peit ia ka video, kaba pyni ba ki nongniah trok kila leit ban siew pisa ha kine ki sem, ka jingpeitbniah ki Pulit bad jingdon ki Pulit kam shym la don atia. Lada phi peit ia ki jingtalasi ha Shillong, ka long kaba leh hakhmat u paidbah bad kaba shai, ki briew rungkat ki tiar ialeh bad ki jingker kiba paka” ula ong.
“Da kaba peit ia kine ki video, ka jingpeit bniah kam I iahap satia, ka don katto katne ka jingsuba don eiei” ula bynrap.
U Bah Vivek ula pyntip ba ia kine ki pulit constable kiba donkti yn sa sospon na ka kam ban pynthikna ba ka jingtohkit kan long kaba khuid.
Ula pyntip ruh ba ka Transfer Committee jong ka District kan sa shim rai mynta ka janmiet la kan don ne em ka jingpynkynriah kami a u Officer-in-Charge jong ka thain.
Haba ban biang ia ka jingbym ailad, u SP ula kyntu “Nga kyrpad ia baroh ki nongniah trok ba kim dei ban siew pisa sha kino kino ki Pulit kiba don ha surok hapoh ka East Khasi Hills”.
Ki nongniah trok kila shah dawa pisa ha ki Pulit ne kino kino ki kynhun ki lah ban phone sha ka police control room, phone ha u emergency number 112 lane ai jingujor da ka jingthoh sha ka Ophis u SP, ula ong.
