Shillong Nailur 24: U Political Secretary jong u Myntri Rangbah ka Jylla bad Treasurer ka National People’s Party (NPP) Bah Daniel Thangkhiew, ula ong ba ka jingpynsaphriang ia ki khubor ha ki rynsan Social Media ba ki MLA ka NPP ki don ha Delhi ban iakynduh ia ki nongialam ka BJP, kadei tang ka khubor ban ialam bakla ia ki paitbah ka jylla Meghalaya.
“Nga lah iohi ha ki rynsan social media kiba la kam ba 24 ngut ki MLA ka NPP ki don ha Delhi ban iakynduh ia ki nongialam ka BJP na ka bynta ban wanrah ia ka jingkylla ha ka saiñ pyrthei ha Meghalaya. Kine ki jingpynsaphriang khubor kim dei kiba shisha, hynrei kadei tang ka buit jong ki katto katne kiba pyrshang ban ialam bakla ia u paitbah ka jylla Meghalaya” ong u Bah Daniel Thangkhiew uba don mynta ha Delhi, lyngba ka phone.
Ula ong, ba ka seng NPP ka iatylli kawei bad dang ha kine ki sngi u Myntri Ragbah ka Jylla u Conrad K Sangma ula iakynduh ia ki MLA jong ka NPP ha Shillong.
“U Myntri Rangbah ka Jylla bad baroh arngut ki Symbud Myntri Rangbah ka Jylla kiba kynthup ia u Bah Prestone Tynsong bad u Bah Sniawbhalang ki don ha nongbah Delhi. Ka jingleit ka jongki sha Delhi kadei ban leit iakynduh ia ki heh jong ka Ministry jong ka Sorkar Pdeng na ka bynta ban buddien ia ki projek jong ka jylla Meghalaya bad kam dei satai ban iakren ia ka kam saiñ pyrthei kumba la pynsaphriang da ki katto katne ha ki social media” ula ong.
U Bah Daniel ula ong, ba ki MLA bad ki MDC ka NPP ki iatylli kawei bad mynta ki dang pynleit jingmut bad ki dang pynkhreh na ka bynta ka elekshon shiteng samoi jongka MP Lok Sabha bad ia ka elekshon MDC jongka Garo Hills Autonomous District Council (GHADC) ban pynthikna ba ki kyrtong ka seng kin jop donburom.
Ula ong, ruh ba ka jingleit rung ki 8 ngut ki MLA ka UDP sha ka seng BJP kan ym ktah eiei ia ka sorkar jylla kaba ialam da ka NPP bad kitei ki ar tylli ki seng saiñ pyrthei ki donlang hapoh jong ka sorkar MDA-II kaba la ialam da u Conrad K Sangma.
