Shillong, Nailur 22: Ka Special Intensive Revision (SIR) 2026 ha Meghalaya kala kot haduh 85.53 percent, bad sah satang 999 tylli ki Notice kiba dei ban pynpoi, ong u Chief Electoral Officer (CEO) u Dr BDR Tiwari.
U Tiwari u la pynlong ia ka jingbishar bniah online bad ki District Election Officers, EROs, AEROs bad kiwei kiwei ki heh ban bishar ia ka jingshakri jong ki jingpynbna, ki jingbishar, ka jingpynbeit ia ki jingujor jong ki aplikeshon ba la thep hadien ba la pynmih ia ka Draft Roll.
“Na ki 21,69,243 ngut ki nongthep vote kiba la kynthup ha ka Draft Electoral Roll, la pynmih 6,51,735 tylli ki Notice. Na kine, la pynpoi haduh 6,50,736 tylli, kaba sah sa tang 999 tylli ki Notice kiba dang ap ban pynpoi. Baroh ki jingbishar bniah ki long 5,57,402 ha kaba 85.53% na ki Notice la dep ban pynrung kyrteng” ula ong.
U la bynrap, “Haduh mynta, la shem ba 659 ngut ki nongthep Vote kim don hok ban shah kynthup iaka kyrteng jong ki haka Final Electoral Roll, katba 17,97,168 ngut ki nongthep Vote naka thup Draft Electoral Roll kila ioh ban rung shaka thup Final Publication”.
Na ki Notice baroh, 2,22,786 ki dei kiba hap haka thup No Mapping cases bad 4,28,949 ki dei kiba iadei bad ki jingbym iahap ha ka map, ia kaba u CEO u la ong ba dei ban bishar bnaih iaki.
U Tiwari u la bthah ïa ki heh Sorkar ban pynsted ïa ki jingbishar kiba dang sah katba u pynthikna ba uwei pa uwei u nongthep Vote un ïoh ïa ka lad kaba biang ban pynskhem ïa ka jinglong hok ban ioh thep Vote daka aiti ïa ki kot ki sla.
Hadien ka jingpynmih ia ka Draft, ka Jylla ka la ioh 20,948 tylli ki aplikeshon kynthup 11,548 tylli na ka bynta ban pynrung (Phorm 6), 1,220 tylli na ka bynta ban pyrshah/pyndam (Phorm 7), bad 8,180 tylli na ka bynta ban pynkylla bad pynbeit (Phorm 8).
U la kdew ruh ba 1,814 ngut ki Booth Level Agent la thung da ki sengsain pyrthei.
Ka jingbishar bniah kan kut noh haka 18 tarik Nailur, ka tarik ba khatduh ban pynbeit iaki kot ki sla bad ban pynshisha kan dei haka 17 tarik Risaw bad ka jingpynmih iaka Final Publication kan dei haka 21 tarik Risaw.
U CEO u la kyntu ia ki paidbah ban peit bniah ia ki kyrteng jong ki, ban jubab ia ki Notice bad ban leit sha ki jingbishar ha ka por kaba biang lyngba ka voters.eci.gov.in lane ka ECINET app, bad ban pynshisha ia ka jingpynrung kyrteng namar hadien ba la dep pynmih iaka Final Publication tang ka EPIC kam lah ban pynthikna ia ka hok thep vote.
