Shillong, Nailur 22 : U Myntri Sorkar bad MLA ka Jirang Bah Sosthenes Sohtun ha ka sngi Ba-ar, ula ther kylla ia ka Assam ba kynnoh ia ka Meghalaya halor ka jingshlei um bad ong ba ka jingbym biang ki nala jong ka project National Highway bad ka jinglang ki jaboh jabain ha ki wahduid kala wanrah ia ka jingshlei um ha ki thain Jorabat.
U Bah Sosthenes ula ong ba ka jingshlei um ka wan jia wat haba slap malu mala bad kane baroh ka dei namar ka jingbym biang ha ka rukom plan ia ki nala.
“Ka lah ban dei kaba rit ne kaba heh hynrei ngi shem ba da ka jingpyntrei ia ka National Highway, khamtam ki nala, ki lynti tuid um, ngin ym iohi lano ba kan kut” ula ong.
“Da ka jingbret ia ki jakhlia hangtei, da ka jingbym pynkhuid ia ki wahduid, kala nang kynton ia ka jing shlei um wat haba hap slap malu mala” ula bynrap haba pynpaw ba ki kam ka NHAI kim shym la ailad ia ka um ba kan tuid bha lyngba ki nala.
Halor ka jingkynnoh ka Assam ba ka jingpynmadan ia ki lum ha Meghalaya khamtam ha USTM ki dei kiba wanrah ia ka jingshlei um ha Guwahati, u Bah Sosthenes ula ong “Ki mih bun ki jingkynnoh na ka Assam”.
“Teng teng haba shlei um ha sor Guwahati ki kynnoh ia ka Meghalaya, haba shlei um palat ia ka Sonapur ruh ki kynnoh ia ka Meghalaya” ula ong.
U Bah Sosthenes u la pynpaw ba ka long kaba bakla ban kynnoh ia ka Meghalaya haba ki kam tei jingtei ki jia ha baroh arliang pud.
