Shillong, Nailur 22: Ki kor pynkhuid lyer (Air Purifier) kiba la buh ha Byrnihat ki dei tang ka jingpyrshang (trial) bad yn sa pyrkhat ia ka pilot project kaba kham heh lada kane ka jingpyrshang ka long kaba seisoh, ong u Myntri bad MLA ka Jirang Bah Sosthenes Sohtun.
U la jubab ia ki jingkylli halor ka jingjaboh ka lyer ha Byrnihat, kaba la shah kynnoh kum kawei na ki shnong kaba jaboh bha.
“Ki kor pynkhuid lyer (Air Purifier) kaba ngi la pyndait, ka dei tang ka jingpyrshang tangba lada kane ka sienjam ka long kaba seisoh ngin sa iaid shakhmat ban sdang iaka Pilot project” ula ong.
“Lada buh 2-3 tylli ki kor pynkhuid lyer bad lada kane ka long ka jingjop bad lada ngi pynbun iaki kor Air Purifier kata la thikna kan pynduna bah ïa ka jingjaboh ka lyer ha Byrnihat,” u la ong bad bynrap ba u la kyrpad ïa u Myntri Rangbah ka Jylla ban ïaid shakhmat iaka pilot project lada ki jingmih na ka jingpyrshang ka long kaba sei soh bad kaba jop.
Halor ka jingpyntreikam, u Bah Sosthenes u la ong ba la thaw ia ka Joint Action Committee bad ka Meghalaya State Pollution Control Board (MSPCB), ki nongsynshar shnong bad kiwei kiwei ki tnat khnang ban lah ban ujor beit beit pyrshah ia ki karkhana kiba pynkhein ain.
“Kata ka JAC ba kongsan ka ailad ia ki briew naduh ki nongsynshar shnong, ne kiwei kiwei ban ujor beit lada don kino kino ki karkhana kiba pynkhein ia ki kyndon ba la buh da ka MSPCB,” u la ong.
U la ong ba ki kam ki paw bha hapoh ka thain ym tang ha ka kot.
“Ngi la iohi ia kiba bun ki karkhana, shisien ba ki ioh jingujor bad ka MSPCB ka lap ba ki la pynkhein, la khang noh ia ki” u la ong.
Halor ki jingujor baroh kiba la ioh haduh mynta, u Bah Sosthenes u la ong ba um dei ba khlieh iaka Committee bad ia ki jingtip ba bniah yn hap ban ioh na ka Board.
U la pynshai ruh ba ka JAC ka treikam hapoh u pud u sam jong ka Meghalaya.
“Na ka liang ka Meghalaya namar ba ia ka JAC la thaw hapoh u pud u sam jong ka jylla jong ngi, kumta ngam lah ban ong shaphang ka Assam” ula ong.
