Dei ki dkhot KSU, ong ki Pulit na ki sakhi ba ioh lum
Shillong, Nailur 19: Arngut ki briew kila shah kem bad la hukum ban set ia ki 14 sngi hapoh ka Judicial Custody halor ka jingkynnoh ba kila tynrah da ka thuk thuk ia u Additional SP Traffic u Lovish Garg ha ka por ba u dang pynlong ia ka jingkhmih bniah ha Urkaliar, ki pulit kila pynpaw ruh ba na ki tiar ki tar kiba kila ioh kurup kala pawshai ba kidei ki dkhot jong ka Khasi Students’ Union (KSU).
U SP in-charge Traffic ka East Khasi Hills, u Hari Prasath M R ula ong, ba ia katei ka jingpynap ban khmih bniah ne ban talasi kadei kaba la leh da ki pulit jong ka thanad, Traffic bad ki SOT hapdeng ka por 11 baje mynmiet haduh 2 baje mynstep.
“Kala don kawei ka thuk thuk kaba la niah da uwei ryngkat bad uwei pat uba shong nadien kiba pyrshang ban kiar na ka jingshah khmih bniah ha ka por kumba 1:30 mynstep. Haba u Additional SP (Traffic) ula pyrshang ban pynsangeh ia ki, kila tynrah pynban ia u bad ula mynsaw. Kitei baroh arngut kila shah kem bad la kurup noh ia katei ka thuk thuk” ong u Prasath.
Kine ki arngut kila shah pynngat ha ki kyndon ba ki don jingthmu ban shim ia ka jingim, ban ialeh pyrshah ban iaid lait ia ki jingbthah jong ki nongtrei sorkar bad ban pynmynsaw jur ia u nongtrei sorkar.
U Garg uba la mynsaw ha ka bynta jong ki kjat bad ka khlieh mynta ula don ha ka met kaba biang.
“Lah pynkynriah noh ia u sha Hospital bad lah dep ruh ban suh ia ki jaka kiba u mynsaw bad u don ha ka met kaba biang” la ong u Prasath.
U SP ula ong ba ha ka jingleh ia ka jingkhmih khmiah ia ka jinglong jingman ne Medical Examination la shem ba kitei baroh arngut kila shoh khawiang.
“Ha ka jingleh ia ka Medical Examination la lap ba kitei kila shoh khawiang, kumta ka lah ban dei kawei na ki daw. Ka jingtohkit shuh shuh ia ki kan dang iai bteng” ula ong.
Ha kaba iadei bad ka jingdonbynta bad ka seng KSU, u Prasath ula ong, ba ki pulit kim shim la leh ia kano kano da kaba shu mutdur.
Haba kylli la kidei ki dkhot jong ka KSU, ula ong, “Hooid. Ka jingtohkit ka dang iaid shakhmat bad kaei kaba kila lap kadei kaba la dep ban pynbna lyngba ka kyrwoh khubor”.
Haba kyntait ia ka jingkam ki bahaiing, ula ong “Ngi don ia ki sabut kiba biang. Ka jingpynpaw ka jong ngi kadei katkum ka jinglap ia ki sabut. Da kaba pynshong nongrim ia kitei ngi lah pynngat ia ki hapoh ki kyndon”.
Ula ong ba ki don ki sabut kaba kim lah ban pyntip ne ban sam sha kiwei pat ha kum kane ka por namar ba ka jingtohkit ka dang iaid shakhmat.
“Kila don katto katne ki sabut, ia kaba ngim pat lah ban pynbna sha ki paitbah” ula ong.
Ha kaba iadei bad ka jingshngain jong ki pulit kiba don ha ki jaka khmih bniah ne jaka talasi, u Prasath ula ong ba lah dep ban pynkylla thymmai ia ka rukom treikam ka jongki.
“Ngi lah bep ban bthah ia baroh ki pulit, kumno ba kin leh pyrshah ia kiba pynkhein ia ka aiñ haba ki kylla kum ki nongleh ia ki kam thombor. Ia ki jingtip shaphang ki kali kiba pynkhein yn sa pyntip mardor ha kiwei pat ki lad kiba ap talasi khnang ba ngin lah ban iohkem ia ki” ula ong.
