Shillong, Nailur 18 : Ki Pulit ka Jylla kila rah tohkit ia u General Secretary ka Khasi Students’ Union (KSU)- East Jaintia Hills Unit samla Kwilness Suchiang, uba ialam ban pyndem ha ka jingduwai hashuwa ka rally thuk thuk ha ka 19 tarik Nailar, kaba la wanrah ia ki kam thombor ha kylleng ka nongbah Shillong.
Ia u samla Kwilness lah leit kem ia u na Iing ha Lumshnong, East Jaintia Hills hynne ka sngi Thohdieng bad la wan kit ia u sha Sadar Police Station hashuwa ban pynlait pat ia u.
Kat kum ka jingiathuh u samla Kwilness, ki Pulit kila tohkit nyngkong eh ban pynthikna ba dei ma u, uba ialam ia ka jing duwai hashuwa ka rally bad hadien ia ka jingdon bynta jong u ha ka rally.
Ka KSU ka pynpaw ia ka jingsngewkhia halor ka rukom treikam jong ki Pulit bad kynnoh ba kane ka jingleit kem ban rah tohkit ka pyni shai ia ka jingpyrshang ban pyniasoh ia u samla Kwilness bad ki kam thombor ba jia ha ka 19 tarik Nailar, tang namar ba u don bynta ha ka jingduwai na ka bynta ka rally ba kan iaid beit iaid ryntih khlem kano kano ka jingkulmar.
“Hato ban duwai ruh ka la long beain seh? Bad ka jingdon bynta ha ka jingduwai hi kam lah ban long ka sakhi ba pyni ba u briew u don bynta ha kano kano ka kam pynjulor” kynthoh tyngeh ka KSU.
Ka KSU kala ong “Lada ki Pulit ka don ki sakhi kiba biang pyrshah ia kino kino ki briew kiba donkti ha ki kam pynjulor, ka kam jong ka Pulit ka long ban tohkit hok, pynshong nongrim ha ki sakhi, wad ïa ki briew kiba don bynta shisha, lum ïa ki sabut bad leh ïa kaba donkam katkum ka ain”.
Kala kynthoh ba ka jing ïai bteng ban kynnoh bad khot hajir ïa ki dkhot lane ki nongkitkam ka KSU tang namar ka jingdon bynta jong ki ha ka seng, bad ban pyniasoh ïa ki bad kano kano ka jingjia khlem da pyni ïa ka jingdon bynta jong ki, kam lah ban long ka rukom tohkit kaba dei.
“Ka KSU ka kwah ban kylli, hato ki Pulit ki dang pynleit jingmut shisha ban wad ïa ki briew kiba donkti ha ki kam pynjulor, lane ka shu shim ïa ka lynti kaba suk da kaba pynshitom ïa ki dkhot ka KSU tang namar ba ki la don bynta ha ka jingiakhih paidbah?” kala ong.
“Ka bor ban khot, tohkit, bat ne kem ïa u briew ka wan ryngkat bad ka jingkitkhlieh ban pyndonkam ïa kata ka bor katkum ka ain, ki sabut bad ka nongrim jong ka jingtohkit kaba hok” ong ka KSU haba bynrap “Ka jingdon jong u briew ha ka rally, ka kyrdan jong u hapoh ka seng, lane ka jingdon bynta jong u ha ka jingduwai shuwa ban sdang ka prokram, kam mut ba u dei u nongkitkhlieh ïa kino kino ki jingjia kiba la jia hadien kata”.
Ka KSU ka dawa ba ki Pulit ki dei ban jubah shai halor kane ka jingkylli bad ong ba ka KSU kan ym sngap jar haba ka bor Sorkar, khamtam ka bor Pulit, la pyndonkam ban pyntieng lane ban khanglad ia ka sur paidbah.
