Shillong,Nailur 17 : Ka Synjuk ki Nongsynshar Shnong ka thain Ri Muliang (SNSRM) kala pyntip ba ka Sorkar Jylla kala pynskhem ban tei ia ka Ophis ba pura jong ka Ri Muliang C&RD Block hapoh ka shnong Tynghor.
Ka SNSRM kaba mihkhmat ia ki 60 tylli ki Shnong ka thain, kala pynbna ia kane ka rai ka Sorkar ha ka jingialang paidbah ba pynlong ha ka sngi Palei ha madan shnong Tynghor, kaba la wan iashimbynta da ki nongshongshnong na baroh kine ki shnong.
Ia kane ka jingialang la pynlong da ka jingthmu ban ai jingpynshai halor ka jingwan iakynduh ka Synjuk ia u Symbud Myntri Rangbah Bah Prestone Tynsong myn ha ka 9 tarik Nailur ha Secretariat, Shillong.
Ki Nongialam ka Synjuk kila pynpaw ba kane ka jinglum ia ki nongshongshnong ka long eh ba kin shai bad kin iohsngew dala ki jong ki skhor na ki nongialam, ba ia ka Ophis ka Ri Muliang C&RD Block yn tei beit ha ka shnong Tynghor ym sha kiwei kiwei ki jaka.
U Nongaiktien ka Synjuk Bah Distarborlin Wanñiang u la ong, “Ka jingai khublei ka long khamtam ïa ka sorkar kaba la sngap ïa ka sur bad jingud jingnam jong ngi kiba bun balang, namar kam dei kaba u MLA lane u MDC kiba leh donbor ïa kane ka kam, lane ka sorkar lane mano mano. Hynrei naduh ka sngi kaba sdang hi ngi dawa ïa kane ka Block namar ki paidbah kiba bun ki Ia mon ban buh ïa ka ophis ba pura jong ka Ri Muliang C&RD Block ha Tynghor”.
“Ngim lah ban klet bad shu ieh ïa ki paidbah ha ka umdum namar haba ngi dawa nyngkong eh ngi lum ïa ki paidbah. Hynrei haba mynta ka kam ka la urlong, ka dei ruh ka kamram jong ngi kum ki nongïalam shnong ban pynshai bad ai ka jinghun sha ki paidbah. Kumba ki la bynshet ha ngi ka Synjuk ban kyntur ïa kane ka kam, ka dei ruh ka kamram ba ngin ai ka jingshai sha ki paidbah”.
U la ong ruh, “Ym shym don mano mano ba leh donbor bad ym dei ruh ba ngi ïaleh politik bad no bad no, kam dei ruh ka kam kaba pynïohnong ïano ïano. Hynrei, ka dei beit na ka bynta ka jingïohnong jong kiba bun balang, u luk u lak bad baroh kiba hap hapoh jong ka Ri Muliang C&RD Block”.
