Shillong, Risaw 12 : Ka kynhun ialehkai cricket ka Meghalaya kala shah rem da 7 wicket pyrshah ia ka Vidarbha ha ka Vinoo Mankad Trophy, kaba long hynne ka sngi Balang ha Pune.
U slap ula pynslem ia kane ka jingialehkai U-19 hynrei dei haba la kham bha ka suin bneng, ka Meghalaya kala shah phah tied nyngkong ha ka Vidarbha kaba jop ia ka jingkynting pisa.
U Mrinal Das ula pyrshang ban ialehkai bha kum u nongtied nyngkong hynrei ka jingkamai run jong u ba 13 run ka dei kaba heh duh bala kamai da ki nongtied ka Meghalaya, kaba la lah ban kamai tang 30 run bad hap 9 wicket shuwa ka jingialehkai bha hapdeng u Raghav Magotra (17 not out) bad u Gavineal Marpna (13) kaba ialam ia ka kynhun sha ka jinglah kamai ba 57 run baroh lang.
Ki nongkawang bol kim shym la ioh satia ia ka lad ban iada ia ka thong hynrei kane kam shym la pynsangeh ia u Bosrang R Marak ban shim ar wicket katba u Magotra ula ioh shim shi wicket. Ia kine ki wicket la shu ioh ban catch da u Bharat Gurung.
Ka Vidarbha kala lah ban beh ia ka thong tang hapoh ka 7.5 over. Ka Meghalaya kan iakhun pat ia ka kynhun ka Rajasthan ha ka sngi palei.
