Shillong, Nailur 16 : U Myntri Rangbah Conrad K Sangma ha ka sngi Ba-ar ula iathuh ba ka Kynhun Myntri kala ai jingmynjur ban thungkam ia 7 ngut ki Ophisar bala shongthait kum ki consultant bad advisor ha ki agency bapher bapher jong ka Sorkar bad ki externally aided project.
Hadien ba pyniaid ia ka jingiaang, u Conrad u la ong ba ka rai ka kynthup ia 4 tylli ki mat kiba iadei bad ka jingpynjlan ia ka jingshakri.
U ong ba baroh kine ki Ophisar kila trei ha ki mission bapher bapher bad ki externally aided project.
Haba jer kyrteng ia ki, ula ong ba u Superintendent ka PWD bala shongthait K Diengdoh un iai bteng ban long u consultant ka PMGSY hapoh ka MSRRDA, u Ophisar IAS bala shongthait Bah G Kharmawphlang kum u Executive Director (Technical) hapoh ka MBMA, u Chief Engineer bala shong thait B Marak kum u Advisor ka Meghalaya Integrated Transport Project, u bah M Kharbani kum u General Manager ka MBMA, AS Suting kum u Assistant Project Director ha ka MBDA, Director ka Agriculture bala shongthait D Lamar kum Advisor ka MBMA bad Aiban Swer kum Additional Director ha ka MBMA.
U Conrad ula ban jur ba kane ka jingthungkam ia ki ka long shabar jong ka rukom pynkiew kyrdan ba man ka por.
“Kine kim dei ki kam Sorkar kaba ngi la pynjlan ia ka jingshakri jong ngi bad khang ia ka lad kiew kyrdan ia ki Ophisar junior. Kine ki dei ki externally aided project ia kaba la thungkam kyrpang ia ki kum ki consultant bad advisor” ula ong haba bynrap ba kum kine ki jingthungkam ki donkam ia ka jingmynjur ka kynhun Myntri.
U bynrap ba kine ki kam ki dei kiba laitluid bad la bei tyngka ia ki da ka externally aided project.
