Dimapur, Risaw 12 : U Myntri Rangbah (CM) ka Bihar u Nitish Kumar hynnin ka sngi ba Ar ula pynthikna ba ka JDU kan iakhun na ka bynta ban pynioh ia ki hok jong ki paid nongshong shnong ka Nagaland.
Da kaba pynpaw ba ka party kan iai bteng ban iadon ryngkat lang ha ka jingialeh ban weng noh ia ki jingeh jong ki Naga, u Kumar ula pynpaw ka jingsngew bynniaw balei ba ka sorkar pdeng kam pyntreikam ia ka jingiasoi soskular bala iasoi ha ka jingiadon ryngkat lang u Myntri Rangbahduh (PM) ka ri u Narendra Modi bad u Myntri kam pohiing barim u Rajnath Singh ha ka jingialang kaba iphuh iphieng ha ka snem 2015.
“Ngam tip shuh balei ba ka sorkar pdeng kam leh ia kane,” ong utei u nongialam ka JDU.Ha kajuh ka por ula ban jur ia ka sorkar India ba ka dei ban weng noh shisyndon ia kane ka jingeh jong ki Naga.
U Kumar ula wan sha kane ka jylla na ka bynta ka jingialang jong ka ‘All Nagaland Bihari conference’ ba la pynlong shibynta ban rakhe ia ka lyngkhuh sngi kha kaba 120 jong u Loknayak Jaiprakash Narayan, ia uba la tip bha ruh kum u JP hapoh Dimapur district sports complex stadium.
Hadien ba ula wan poi hapoh kane ka stadium, une u CM ka Bihar ula pynlong ka jingleit buh syntiew hakhmat k dur jong u Jaiprakash Narayan.Nalor kata ula pynpaw ruh ka jingkmen ban don ha kane ka jylla na ka bynta ban rakhe ia kane ka sngi ba kyrpang.
Haba pynpaw halor ki synniang kiba u Jaiprakash Narayan ula noh ha ka jingialeh laitluid jong ka ri bad halor ka roi ka par jong ka ri India, u Kumar ula ong ba u JP ula wan iuhkjat ha Nagaland ha ka snem 1964 bad ula shong la sah ha kane ka jylla haduh ka snem 1967.Ha kaba kum kane ka por ula ong ba u Narayan uba dei u nongtrei kam bhalang ba pawkhmat ula leit ruh sha baroh ki shnongk i thaw hapoh ka jylla kum u dkhot jong ka ‘Peace Mission’ khnang ban tip ia ka jingsngew jong ki nongshong shnong kiba dei ki Naga halor ka jingialeh ka jong ki na ka bynta ban ioh la ka jong ka jinglaitluid.
“Dei lyngba ka jingkyrpad ka jong u ba la pynjari ia ka jingsangeh iasiat hapoh Nagaland,” ong u Kumar. “Ula wan kum u dkhot jong ka ‘Peace Mission’ bad thaw ia ka Nagaland Peace Centre,” ula ong shuh shuh.U Kumar ula ong ruh ba ka long ka jingsarong na ka bynta ki nongshong shnong ka jylla Nagaland ban kynmaw bad leh burom ia u JP.
Ha kajuh ka por une u CM ka Bihar ula pynthikna ruh ban shim ia baroh ki lad ki lynti na ka bynta ban kyntiew ia ka ioh ka kot bad ka roi ka par ha kane ka jylla.
Haba pynpaw kumno ba ka sorkar jong u kala lah ban kyntiew ia ka jylla Bihar, u Kumar ula ong ba ba baroh ki longiing ki dei kiba la ioh ia ka bording ilektrik bad ka jingpynbiang ia ka umbam um dih, katba ha kaba iadei bad ki hospital, ki surok, ki jaka pule kane ka jylla kala sakhi halor ka jingkiew shaphrang.
Ia u Kumar la wan synran lang da u national president ka JDU u Rajiv Ranjan Singh, ki MP ka party bad ki myntri sorkar ka Bihar.
Ha ka jingkren, u president ka JDU u Singh ula ong kaei kaba la jia ia ki jingialap jong ka BJP “ka ilekshon na ka bynta ban weng ia ki jingeh” hashwa ka ilekshon assembly ha u 2018 ha Nagaland.Ula ong ba kane ka party BJP kam shym la lah ban weng ia ki jingeh kiba iadei bad ki Naga wat hadien san snem.
U Singh ula pynthikna ruh ban pynkylla ia ka Nagaland kum ka Bihar lada ka JDU kan ioh ia ka jingkyrshan abd ka jingiatreilang jong ki paidbah nongshong shnong ka jylla.Ha kane ka sngi la ioh ruh ka jingkren na u president ka JDU Nagaland, u NSN Lotha.
