North Lakhimpur, Risaw 12 : “Ka sorkar Assam bad Arunachal Pradesh kila iaid shakhmat na ka bynta ban pynlong ia ka jingiakren halor ki kam iakajia pud kiba la slem bah hapdeng jong ki, bad kata kaba lah ban long shabar jong ka iingbishar,” ong u myntri ka tnat Labour ka Assam u Sanjay Kishan bad u myntri ka tnat ka rep ka riang ka Arunachal u Er Tage Taki ha ka jingialang bad ki lad pathai khubor ha North Lakhimpur mynta ka sngi.
Kitei ki mynta kila wan iashim bynta ha ka jingialang jong ka ‘regional committees’ jong ka Assam bad Arunachal Pradesh kaba la long hapoh ka ophis treikam jong u Deputy Commissioner ka Lakhimpur na ka bynta ban pynlong ka jingiakren halor ki kam iakajia pud hapdeng kine ki artylli ki jylla, kata hapdeng ka Kamle bad ka Lakhimpur district.
Haba kren sha ki lad pathai khubor, u myntri ka Arunachal u Taki ula ong ba kam shym la don kano kano ka jingiakajia pud hapdeng kine ki artylli ki district, kata lait noh tang ha kaba iadei bad ki jaka jong ka tnat forest.
Nalor kata ula ong ruh ba ia u pud u sam ba la pynkhreh bad pruid dak da ki bor sorkar kam dei satia ban wanrah kano kano ka jingsngew iapher hapdeng ki paid nongshong shnong.
Na ka liang u myntri ka Assam, u Kishan ula kyrpad ia ki nongshong shnong kiba shong ba sah ha ki thain khappud jong baroh ki artylli ki district ba kim dei ban klumar jingmut lyngba kane ka sienjam ba la shim da ki bor sorkar jong kine ki ar jylla.
Ula ong ruh ba ia kane ka jingiakajia pud hapdeng ka Assam bad ka Arunachal Pradesh yn pynkut noh shisyndon ha ka jingialang hapdeng ki Myntri Rangbah (CM) jong kine ki ar jylla.
