Shillong, Nailur 07 : Ka Iingkashari Meghalaya High Court kala pynwai noh ia ka mukotduma halor ka jingshah shoh bad shah pyniaid parade u muktiar ha Shillong, hadien ba pdiang ia ki sienjam bala shim da ki Pulit bad ka Bar Council.
Ka division bench ka Chief Justice Revati Mohite Dere bad Justice W Diengdoh kala pynmih ia kane ka hukum ha ka 1 tarik Nailur.
Ia kane ka mudui la shim kum ka suo motu halor ka jingmudui da ka jingthoh ha ka 29 tarik Naitung da ka High Court of Meghalaya Bar Association bad ka Shillong Bar Association, kaba kynnoh ba uwei u muktiar ula shah tan napoh ka chamber ha Keating Road da ka kynhun sengbhalang, shoh bad shah pyniaid parade sha Sadar Police Station, katba ki Pulit ki shu long tang ki nongpeitkai.
Ka Bar Association kala kyrpad ban pyntreikam ia ka hukum ka Supreme Court ha ka mukotduma Tehseen S Poonwanlla, kaba buh ia ki kyndon ban khanglad ia ki jingleh donbor da ki kynhun ki bym dei ki bor Sorkar.
U Advocate General A Kumar ula pyntip ba ia ka ejahar lah dep ban register pyrshah ia ki briew kiba donkti bad ka jingtohkit kala iaid shakhmat.
Ula kular ia ka Iingkashari ba yn pyntyllun ia ka kam shaduh kaba kut bad ka Jylla kan bud ia ki kyndon bala buh ha ka mukotduma Poonwalla.
Ka Iingkashari kala bishar ruh ia ka affidavit bala mudui da ka High Court Bar Association bad ka Bar Council of Meghalaya.
Ka Bar Council kala pyntip ba kala dep buh ia ki drop box ha ki Ophis jong ka bad sdang pyntreikam ia ka portal ban ujor online kiba iadei bad ki jingshah jrong kti kynshlein ki muktiar kynthei bad ki intern, kumba la bthah ha ka jingialang ba long ha ka 31 tarik Naitung.
Halor ka jingkynnoh jrong kti kynshlein u muktiar, la pyntip ia ka Iingkashari ba ka Shillong Bar Association kala sospon ia u bad kala pynlong ia ka jingtohkit da ka Bar Council of Meghalaya.
