Kwah pyniar ia ka jingtohkit halor ki jaka puta bad ka kamai kajih
Shillong, Nailur 07 : Ka Jaintia National Council (JNC) kala pdiang ia ka rai jong ka Sorkar Jylla ban thung ia ka Fact-Finding Committee ka ban bishar ia ki jingsngewkhia kiba mih na ka project tih mawshun ka Shree Cement Ltd ha Lum Syrman bad Daistong.
Ha ka shithi bala phah sha u Myntri Rangbah ka Jylla Conrad K Sangma ha ka sngi Nyngkong, u President ka JNC Bah Sambormi Lyngdoh ula iaroh ia ka sienjam ba shim ka Sorkar ban pynsangeh lut ia baroh ki kam bad ki project jong ka Shree Cement Ltd kat bym pat dep ka jingtohkit.
“Kane ka dei ka sienjam ba kongsan bad kaban pynsngewskhem biang ban ai ia ka jinglehhok, ioh ka jingshaniah ki paidbah bad ban pynbeit ha ka rukom kaba dei ia kane ka kam” ong u bah Sambormi.
Ka Council kala dawa pat ba kane ka jingtohkit kam dei ban long tang halor ka rukom pynlong ia ka public hearing ba long ha ka 31 tarik Naitung, 2026 na ka bynta ka project mawshun ha Lumsyrm hynrei ka dei ban kynthup ia bun ki kam kiba jia ha kane ka sngi.
“Ka jingtohkit kam dei ban long tang ia ka jingpynlong ia ka public hearing hynrei dei ruh ban pyniar sha ki kam kiba khamheh bad ba kongsan kiba don hapdeng eh jong ka jingiakajia” ong ka shithi.
U Bah Sambormi ula ong ba ki jingthoh bala dep ai hashuwa kila kdew lut ia ki jingsngewkhia kiba iadei bad ka jinglong trai ia ki jaka, ka jingbym don ki jingai jingbit, ka jingktah ia ka rep ka riang bad ka kamai kajih, bad ka jingiada ia ki briew kiba shah ktah.
Ka JNC kala kyntu ia ka Committee ban bishar bniah hangno ka hok ki trai jaka ka don jong ki artylli ki elaka ha Lum Syrman, kynthup ki jingkam jong ki, ka jingdon jaka, ki kot ki sla bad kino kino ki jing ujor ba iadei bad ka jingkynnoh pynbor, kurup jaka lane jingpynbor haba iadei bad kane ka jingtyrwa tih mawshun.
“Ka Committee ka lah ban bishar kyrpang ia ka jingud jingnam jong ki nongrep kiba, la bun phew snem, ki shaniah ha ki jaka ha Lum Syrman ban kamai jakpoh, bsa iala ka iing ka sem bad ka jingim ba man ka sngi” ong u Bah Sambormi.
Ka Council ka dawa ruh ba dei ban phaikhmat kumjuh sha ka shnong Daistong, kaba la ieng ka karkhana jong ka kompani, da kaba bishar ia ka jingsngewkhia jongki trai jaka bad ki nongshongshnong haba iadei bad ka jingpyndonkam ia ki jaka puta, ka jingiasyllok ia ki trai shnong bad ka jingktah ia ka kamai jakpoh.
Ban pynthikna ha kaban ioh ia ki jingtip ba thikna na ki nongshongshnong, ka JNC kala kyrpad ia ka Sorkar ban pyrkhat ha kaban pyniadon bynta lang ia ki MLA ka thain bad ki Executive Member ka JHADC ba dei khih ia ka Elaka Nongkhlieh bad Elaka Sutnga kum ki dkhot, nongshah khot sngewbha ba kyrpang ne ki briew ba lah ban pynioh ia ki jingtip.
Ka JNC ka ai jingmut ba ka Committee kan leit iuhjhat dalade ha Lum Syrman bad Daistong bad iakren markhmat bad ki trai jaka, ki nongrep, ki bor synshar shnong bad ki seng kynthei bad ban buh ia ka rukom treikam da ka por na ka bynta ban lah aiti ia ki kot ki sla, ki dulir khyndew bad ka jingshim jingthoh ia ki jingbatai (statement) ki nongsakhi.
