Nongpoh, Nailur 07 : Ki nongshongshnong ka 9 Mer Baridua, kila ioh ban bat ia ka longkmie kaba kynnoh pom da u sdie iala u jong u kurim hala iing ha Baridua, hashuwa ba kan phet rieh.
Ia kane ka briew ba kyrteng ka Poonam Bosper la ioh ban bat da ki paidbah ha ka surok bah NH-27 katba ka dang iaid lynti na katei ka thain ban phetrieh. Ia kane ka briew la aiti noh sha ka Dorbar Shnong bad hadien la aiti sha ki Pulit ka Khanapara Police Station ba kin leh ia kaba donkam.
U Khun uba don lang ha ka por ba jia katei ka jingjia, ula iathuh ba u Kpa jong u Bah Sikander Lyngdoh ha katei ka miet ula wanrah doh sha iing ban shet, hynrei tang katto katne por,kala mih ka jingiania hapdeng kine ki arngut ki shikurim bad poi ruh sha ka jingiarah kti.
U iathuh ba ka Poonam ong u kala shim da u sdie bad kynnoh pom ia u Kpa na ka khlieh katba u dang shongpeit TV. La kynnoh ruh ba kala pom haduh lai ne saw sien shuwa ba kan phet na iing bad kala bret ia u sdie sha khlaw kaba don marjan ka iingsah.
Une u Khun u iathuh ba tang hadien kane ka jingjia, ka Poonam kala phone ia ka hynmen kynsi bad iathuh ba kala pom ia u lok haba kyrpad ia ka kan leit peit ia u.
U Rangbah Shnong Bah Ioanis Narleng ula pynpaw ia ka jingsngewkhia halor kane ka jingjia bad pynrem ia ka jingleh jong kane ka briew.
U Bah Ioanis ula kyrpad ia ki bor ba dei khmih ba kin pynlong ia ka jingtohkit kaba bniah bad ban shim ia ki sienjam kaba dei kat kumka ain khnang ba ka jingshisha jong kane ka jingjia kan paw pyrthei.
