Shillong, Nailur 06 : U Kyrtong ka NPP ban iakhun ia ka elekshon shiteng samoi ka Shillong Lok Sabha Dr. DRL Nonglait ula kyrpad ia ki nongthep vote ka West Khasi Hills da kaba ong ba ka thain kam pat ju don ia ki nongmihkhmat ha Parliament bad ka NPP kala burom ia ka district da kaba pynieng ia u kum u kyrtong.
Haba kren ha ka jingialang ialap elekshon ha Maweit kaba hap hapoh ka Mawshynrut Constituency ha ka sngi Saitjain, u Dr Nonglait ula ong “ka WKH kam pat ju lah ban pynmih ia u nongmihkhmat. Ngi la ioh ia u MP ba tang arsnem. Ka NPP kam shym la niewbein pyrshah ia ka WKH. Ha ka por ba ka NPP ka khot ia nga, ka kynmaw ia phi, ki paidbah ka WKH. Ka WKH ka don ia ka hok bad ka NPP kam shym la leh shiliang”.
“Lada u Bah Sniawbhalang u ong ba ha ri-lum Jaintia, u Dr Nonglait un tam bun bha ha ka jingioh vote, ha WKH ngi dei ban tam kham bun shuh shuh” ula ong.
Ula kular ba lada u shah jied kum u MP un treikam khlem ka jingkhein party. “Kum u President ka KAS, Nga kren na ka bynta ki Khasi, Pnar, Lyngam ba kin kiew shakhmat hala ki shnong ki thaw. Ha ka seminar bad ki kot jong nga, Ngam ju kren tang ia kawei ka party. Nga trei na ka bynta baroh. Mynta lada phi jied ia nga kum u MP, Ngam trei na ka bynta baroh, kan nym don ka jingsngew iapher party” ula ong.
Haba batai balei ba u jied ia ka NPP, u Dr Nonglait u ong ba ula shim ia kane ka rai hadien ka jingpyr khat kaba sani bha.
“Nga ieng ha kane ka rynsan sain pyrthei hadien ka jingbuh ia u mawnongrim uba skhem, hadien ka jingthew jingwoh bha. Balei ba nga iatreilang bad kane ka party? namar Nga iohi ba kane ka party ka dei kaba treikam bha” ula ong.
Ula kdew ia ki kam pynroi ban kyrshan ia ki jingkam. “Ngi la ioh ia ka C&RD Block ha Shallang bala plie ha u 2022, ha Nonglang ruh kala don ka Block nalor ka jingioh ia bun ki skhim bad kane baroh ka dei namar ka jingtreikam ka Sorkar. ka surok Nongstoin-Rambrai-Kyrshai ruh kala bha mynta bad ka dei kane ka Sorkar kaba wanrah ia ka” ula ong.
U ong ba ka Sorkar MDA kala pynrulong ia ki jingdawa kiba la sahteng la slem bha. “Dang shen ha Iingdorbar Thaw Ain, kala mynjur ia ka resolution ban kynthup ia ka ktien Khasi ha ka Khyrnit ba Phra. Ngi la dawa ia ka lah bunsnem hynrei dei ka Sorkar MLA ba ialam da ka NPP kaba nud ban shim ia kane ka rai. Na ka bynta ka ILP ruh ka dei kane ka Sorkar kaba la mynjur ia ka resolution nalor ban pynlong ia ka ktien Khasi kum ka Official Language” ula ong.
Ula kren ruh halor ka bynta jong u kum u Director jong ka College Development Council.
“ka Jylla kam pat ju don ia ka medical college. Mynshem snem ka Sorkar kala plie ia ka medical college ha Shillong, ka Shillong Engineering College ruh lah dep ban plie. Mynta kane ka Sorkar kan sap lie sa artylli ki Nursing College ki bym pat ju don mynno mynno ruh bad baroh kine ki wan lyngba ka Council ba nga khlieh kum u Director. Ka dei ruh kane ka Sorkar kaba la wanrah ia ka State University” ula ong.
