Ka NPP kam ju ibein iano iano ruh
Shillong, Nailur 06 : U Symbud Myntri Rangbah bad National Vice President ka NPP Bah Sniawbhalang Dhar ula ong ba ka Sorkar ba ialam ka NPP kam ju pynsngap ia ki jingkynthoh pyrshah bad ka bteng beit ban trei iala ka kam na ka bynta u paidbah khlem da ibein ne leh shiliang khmat iano iano ruh.
Haba ialap elekshon ha Maweit na ka bynta u kyrtong ka NPP Dr DRL Nonglait ban iakhun ia ka elekshon shiteng samoi ka Shillong Lok Sabha, u bah Sniawbha ula ong ba ki liang pyrshah ki niew ia ka NPP kum ka Sorkar ba leh donbor bad ka bamsap.
“Ki don kiba ong ba ka NPP ka dei ka Sorkar ba leh donbor, ka Sorkar kaba tuh. Nga kwah ban pynshai-phi kren katno katno ruh, ngim ju pynsngap bad ngin khuslao namar ngi la don ia ka sniewdoh ba rben. Ngi donkam ban trei. Katba phi nang kynthoh ia nga, katta ngi dang trei na ka bynta u paidbah. Kata ka dei ka Sorkar NPP” ula ong.
U Bah Sniawbha ula ong ba ka roi ka par hi kam dei ka kam kaba lah ban leh shimiet shimet hynrei ka dei kaba hap pyntreikam da ka bynta bynta.
“Kum ka nuksa ka Civil Sub-Division- Lada ngi ai Block, ka Block kan lah leh aiu marwei?, Lada ngi ai College hynrei kim don ki nonghikai, mano ban wan? Ta ka daw ki nongialam ki leh ia ki kam da ki bynta bynta” ula ong.
Ula kdew ia ki project shna surok ban pyni ba ka Sorkar kam leh shiliang khmat iano iano ruh.
“Kiba bun na kine ki constituency ki dei kiba mihkhmat da ka UDP bad HSPDP, hynrei ngi dang ai project beit ia ki. Kane ka pyni ba ka NPP kam leh shiliang. Ngam ong ba kiwei ki MLA kim treikam, hynrei ka NPP ka sngap ia ka jingpan u paidbah” ula ong.
Halor ka jingiatreilang ka NPP bad ka BJP, u bah Sniawbha ula ong ba ka jingiatreilang na ka bynta ka kam pynroi kam dei satia ban pyniasnoh bad ka niam.
“Ki ong ba ka NPP ka trei shitom hynrei ka iatreilang bad ka BJP, kam long kaba bha. Tang namar ba ngi iatreilang bad ka BJP, hato ngin kylla niam BJP noh? Kata kaba bakla. Ngi iatreilang bad ka BJP ban wanrah ia ki kam pynroi bad ban kyntiew ia ka jingim u paidbah” ula ong.
“U Dr Nonglait u dei u Presbyterian. Nga dei na kawei ka niam. Hato kane ka mut ba ngan kylla niam noh. Ka Niam hi ka iaid la ka jong, ka sain pyrthei ka iaid laka jong” ula bynrap.
U Bah Sniawbha ula ther tyngeh ruh ia ki seng sain pyrthei kiba pyrta slogan “Ieid Jaidbynriew” khlem da leh pat ia ka kam.
“Ki don ki seng sain pyrthei kiba ong ba ki ieid jaidbynriew. Ka jingieid ka don bun jait. U Kpa u lah ban ong ba u ieid iala ka kurim bad ki khun, hynrei khlem u khaw ha Iing, kam dei satia ka jingieid. Lada u MLA u ong ba u ieid ia ki paidbah hynrei u khlem treikam, kane ruh kam dei ka jingieid” ula ong.
Ula ong ba ki jingkylla kila paw ha ka thain Mawshynrut bad kyntu ia ki paidbah ba kin bteng ban kyrshan ia ka NPP ban ioh kham bun shuh shuh ki kam pynroi.
