Buh jingkylli ia ka jingkem ki Pulit iaki 4ngut ki nongialam ka KSU
Shillong, Nailur 02 : Ka Iingkashari Meghalaya High Court kala pynpaw ia ka jingbym sngewhun bad ka jingiaid jong ka jingtohkit halor ki kam thombor, pynjulor kali bad shoh iaki briew ba iaid lynti ha ka rally thuk thukka KSU ha Shillong, haba pynpaw ba ki Pulit kila dei ban pynsangeh ia ka rally hadien ba ki nongiaid rally kila pynkhein ia ki kyndon ai jingbit.
Ka division bench ka Chief Justice Tevati Mohite Dere bad Justice W Diengdoh haba shong bishar ia ka suo motu PIL (PIL No. 16/2026), ha ka sngi ba-ar, kala bthah ia ki Pulit ban pynsted ia ka jingtohkit bad ban ithuh ia ki briew kiba donkti ban leh ia ki kam thombor.
La pyntip sha ka Iingkasahri ba haduh 22 tylli ki ejahar la dep ban register halor kane ka jingjia- saw tylli ha Shillong Sadar Police Station, 9 tylli ha Rynjah Police Station, 7 tylli ha Mawlai Police Station bad mar kawei ha Laitumkhrah bad Lumdiengjri Police Station.
La pyntip ia ka Iingkashari ba ki Pulit kila kem ia aw ngut ki briew, baroh ki dei ki nongialam ka KSU nalor ka jingioh kurup ia artylli ki kali kiba kynnoh pyndonkam ha kine ki kam thombor, ka jingbishar ia ki jingiakren phone naki 8 tylli ki mobile phone bad ki video CCTV na ki 27 tylli ki jaka.
Hynrei ka Iingkashari kala pynpaw ba kam sngewtynnad satia ia ka rukom iaid jong ka jingtohkit.
Kat kum ka jingong ka Iingkashari, ia kane ka rally la dei ban pynsangeh noh shiteng hadien ba ki nongiaid rally kila pyn khein ia ki kyndon ai jingbit jong ki bor district. Ka Iingkashari kala pynpaw baki nongiaid rally kila deng mask lane tap ia ki durkhmat watla kala don ka jingkular na ki nongpynlong rally ba kin nym leh ia kata.
Ka Iingkashari kala kdew ruh ia ka jingkynnoh pynkhein ia ki kyndonba khang ia ki nongiaid rally ban rah dieng, lathi lane ki tiar pynmynsaw. Kala kdew ruh ba ia ki nombor kali la tap ha kane ka rally.
Ka Iingkashari ka shem ba jin lada ki Pulit kila pynsangeh ia ka rally haba iohi ia ka jingpynkhein ia ki kyndon ai jingbit, kin jin da la lah ban khanglad ia ka jingpynjulor ia ki kali bad ki nongkynti bad shoh ia ki briew.
Ka Iingkashari kala pan jingshai ruh la ia kane ka jingiaid rally la ring video ne em naduh ka jaka ba sdang bad la ki Pulit kila bud ryntih ia ki jingbthah ka Iingkashari Supreme Court ha ka mukotduma Tehseen S Poonawalla v Union of India ba iadei bad ki kam thombor paidbhur.
Kala kylli ruh la ki don kino kino ki Ophisar Pulit kiba tuklar lane pyrshang ban pynsangeh ia ka rally, ka jingshoh ia ki briew lane ka jingpynjulor ia ki nongkynti ha kino kino ki khep.
Haba pynpaw shuh shuh ia ka jingsngewkhia, ka Iingkashari kala buh jingkylli ba kumno ki Pulit ki iathuh iaki saw ngut ki briew ba ka suba bad kem haba da ki spah ngut ki runar, ki donkti ban leh ia kine ki kam thombor ha ka rally.
Ka Iingkashari kala bthah ia ki Pulit ban ithuh ia kito kiba donkti kham kloi kat kaba lah ban ban pynpoi ia ka jingtohkit sha ka jingkut kaba don jingmut, haba ban jur ba ym dei ban mad ia kito kiba shoh ia ki briew lane ba pynjulor ia ki nongkynti.
Halor ka jingthung ia ka SIT bala khlieh da u Inspector General of Police, ka Iingkashari ka bthah ba ia kine ki jingpynsngew ka kashari dei ban rah sha ka jingkhmih jong u Hehduh ka SIT khnang ba ynlah ban shim ia ki sienjam ba mar mar ban ithuh ia kito kiba donkti haki kam thombor.
La bthah ia u Inspector General of Police, Superintendent of Police, East Khasi Hills, bad ki officers-in-charge ka Shillong Sadar bad Lumdiengjri police stations ba kin don hapoh ka Iingkashari ha ka sien shong bishar ban wan. La bthah ruh ia ki Pulit ba kin aiti ia ka kaiphod halor ka jingiaid jong ka jingtohkit.
Ia kane ka mukotduma la buh ban bishar biang ha ka 7 tarik Nailur.
