Shillong, Nailur 2 : Ka Hynniewtrep Youth Council (HYC) kala dawa ia ka Public Account Committee (PAC) ka Iingdorbar Thaw Ain ka Jylla ba kan shong bishar mardor ia ka jingkynshew pisa ka Sorkar haduh T.4,444.43 klur ha ki 22 tylli ki Public Sector Undertaking (PSU) kiba lah pat ban pynmih kamai tang T.0.20 klur ha u snem 2024-25.
Haba kdew ia ka kaiphod ka CAG halor ka Pla tyngka ka Jylla jong u snem 2024-25, ka HYC ha ka mudui sha u Chairperson ka PAC ha ka sngi Balang, kala ong ba ka jingkynshew pisa kaba bun bah kat haduh ka 31 tarik Lber, 2025, kala lah ban wanrah ia ka jingmih kaba rit palat, kaba pynmih ruh ia ka jingkylli kaba sngewkhia jur halor ka jingpyndonkam ia ka pisa.
U President ka HYC Roy Kupar Synrem ula ong ba kane ka kam kala iaid palat ia ka jingmih kaba rit, naba ka Sorkar kala theh biang ia ka pisa sa T.467 klur ha u snem 2024-25 wat hapdeng ka jingbym lah pyntreikam ia ka jingkynshew bala don lypa. Ka Council ka kwah ia ka PAC ba kan khmih ia ki jingpynksan, ka tyllong jong ka pisa bad ka jingkhmih bniah ha lyndet ka jingtheh pisa thymmai.
Ka HYC kala kdew ruh ba watla ka dor sut halor ka jingshim ram ka Sorkar ka long 5.31%, ka jinglah pynmih pisa na ki jingkynshew ha ki PSU kan jan long nod, kaba la nang tynrong ia ka jingkit ba khia ha ka pla tyngka ka Jylla.
“T.4,444.43 klur ka dei ka pisa u paidbah. Haba kat kane ka jingkynshew ka lah ban pynmih pisa tang T.20 lak, ki paidbah ka Jylla ki don hok ban ioh ia ka jubab. Ka Sorkar kam lah ban pynbteng ban kynshew ia ka pisa u paidbah khlem da pyni ia ka jingpyndonkam ia ka pisa, ka jingkitkhlieh bad ka jingmih kaba lah ban shim jingkhein” ula ong.
Ka Council kala ong ba ka PAC ka dei ban bishar bniah ia ka jingtreikam bad ka jinglah ban treikam bha jong baroh ki 22 tylli ki PSU, bishar ia ki jingduna ha ka jingpyndonkam ia ka pisa, tynrong ia ka jingkitkhlieh haba I donkam bad buh da ka por ia ka Sorkar ban ai ia ka Action Taken Report.
