Shillong, Nailur 2: U Myntri ka Sorkar Jylla bad u nongialam ka BJP u Bah Sanbor Shullai ha ka sngi Balang, ula ong ba ki paitbah ha Meghalaya kila sdang ban pdiang ia ka BJP namar jong ki kam pynroi bad ka ong, ba um don jingtip eiei halor ka jingsaphriang ki khubor ba 9 ngut ki MLA ka UDP ki don jingthmu ban pyniasoh noh bad ka BJP.
Haba kaba iadei bad ka jingsaphriang ki khubor, ba ki nongialam ka UDP kila leit iakynduh ia u Myntri Kam Pohiing ka ri u Amit Shah, u Bah Shullai ula ong ba ula iohi ia katei lyngba ki lad pathai khubor.
“Nga lah iohi ia katei tang ha ki kot khubor bad ki lad pathai khubor. Ha ka jingshisha, ngam don jingtip eiei ruh em halor kane. Nga shu iohi ba kila leit ban iakynduh ia u Amit Shah bad ka pyrthei baroh kawei ruh ka tip ia kata” ula ong.
“Na ka liang jong nga, Ngam don jingtip eiei. Kim shim la wan ban iakynduh satia ia nga kum u MLA ka BJP, u nongtrei ba shitrhem jong ka BJP” ula bynrap.
U Bah Shullai ula ong, ba ka seng mynta kadei kaba la pdiang bad kane kadei kaba la pawshai kdar.
“Haba nga leit ha kylleng ki jaka, ha ki prokram, haba nga iakren bad ki, ki lah sdang ban pdiang ia ka BJP. Ngi lah trei shitom bha namar ba ki paitbah ki lah sdang ban pdiang ia ka seng” ula ong.
Ula pynpaw ba lah pyniar ia ka seng ha Mawlai, ia kaba baroh shi katta ym shim la iohi ba ka BJP kan khlain, hynrei dang ha ki khyndiat bnai, ka seng kala thaw ia ka Mandal kaba thymmai.
“Ki paitbah kim shim la khmih lynti ba ki briew ha Mawlai ki lah sdang ban pdiang ia ka BJP, hynrei ngi lah dep ban thaw ia ka Mandal” ula ong.
Ula ong, ba ki nongkitkam ka seng kiba la wan iakynduh ia u dang shen ha Secretariat ryngkat bad u Nongaiktien ka BJP u Bah M Kharkrang, kila iathuh halor ka jingpynrung dkhot kaba man la ka sngi.
“Man la ka sngi ki briew kila wan ban rung ha ki BJP Mandal. Kane kadei ka khubor kaba bha” ong u Bah Shullai.
Da kaba iaroh ia ka Sorkar Pdeng kaba la ialam da ka BJP halor ka jingtheh ia ka pisa bad ia ki kam pynroi, ula ong “Phi lah iohi ia ka rukom treikam ka BJP ha Delhi bad hangne ha Meghalaya, haduh katno ka song pisa la theh ha ka Jylla jong ngi. Ki briew ki lah iohi ia kaei kaba la jia 50-56 snem mynshwa. Hapoh ka 8 snem kaba ngi lah iatreilang bad ka BJP ha kane ka Sorkar, ngi iakynduh ia ki nongialam ka BJP shaduh u Myntri Rangbahduh ka Ri. Phi peit ia ki surok, ki jingkieng, umbam umdih, bording elektrik bad kiwei kiwei ki Scheme. Namar kine ki jingkylla hapoh ka jingsynshar ka BJP, ki paitbah mynta kila rung sha ka seng BJP.”
Haba kylli la kin pdiang ia ki MLA ka UDP, u Bah Sanbor ula ong, “Lada kine ki MLA ka UDP, ki MLA bad MDC na kiwei pat ki seng sain pyrthei ne ki riewpaitbah ne ki nongtrei mon sngewbha ki wan rung, ngan dap da ka jingkmen namar ba ngi dei kiba pdiang sngewbha ia baroh”.
Ula ong ban pynkhlain ia ka seng kadei ka jingbthah kaba hakhmat jong ki nongialam ka BJP ha ka Ri bad ka seng ka plie ia ka jingkhang ban pdiang ia ki nongialam na kiwei pat ki seng sain pyrthei, ki nongialam sengbhalang bad ki riewshimet ban wan pyniasoh bad ka BJP.
