SHILLONG, AUG 28: Ym pat shim la ai ia ka bai lutksan ne Compensation haduh mynta ia ki nongshong shnong kiba la shah ktah na ka jingthmu ban shna ia ka surok Six Lane na Jorabat shaduh Umiam bad ia ka High-Speed Corridor na Umiam sha Silchar, la pyntip ka Sorkar Jylla hapoh ka iing dorbar thawain ka jylla hynne ka Sngi Thohdieng.
Ha jubab kaba la ai lyngba ka jingthoh, ia ka jingkylli jong u MLA ka Nongkrem u Bah Ardent M Basaiawmoit, u Symbud Myntri Rangbah ka Jylla uba khmih ia ka Public Works (Roads) u Bah Prestone Tynsong ula ong, ba ka jingshim ia ki jaka na ka bynta ka National Highways bad High-Speed Corridor Project ha Meghalaya kadei ka kam kaba dang iaid shakhmat hapoh jong ki kyndon jong ka National Highways Act, 1956.
“Ki rukom treikam ki long ban pynthikna ba ki nongshong shnong kin ioh pdiang ia ka Compensation bad Rehabilitation kaba biang katkum ka NH Act, 1956” ong u Bah Prestone.
Halor ka jingsiew baroh ia ka Compensation na ka bynta kitei ki artylli ki projek, u Symbud Myntri Rangbah ula ong, “Ym pat shim la siew ia ka bai jaka sha ki trai shnong na ka bynta ka surok Six-Lane na Jorabat sha Umiam bad wat ia ka Compensation sha ki trai shnong ka Meghalaya na ka bynta ka High-Speed Corridor na Umiam shaduh Silchar ruh ym pat shim la siew”.
