Shillong Nailar 29: U Myntri ka Sorkar Bah Sanbor Shullai ryngkat bad u MLA ka Shillong West Constituency Bah Paul Lyngdoh ha ka sngi Thohdieng, kila leit jurip ia ka jaka jong ka Reid Provincial Chest Hospital, Upper Mawprem, na ka bynta ban shna noh ia ka surok ban pynsuk ia ka leit ka wan jong ki paitbah.
U Bah Sanbor Shullai bad u Bah Paul Lyngdoh kila lum ia ka jingialang ha katei ka hospital ban iatai sani bad ki heh ophisar ka tnad ka koit ka khiah bad PWD ryngkat ka jingdonlang ki nongialam shnong ka Mawbah bad Nongsohphoh ia ka jingthmu ban shna ia ka surok ha katei ka thaiñ.
“Ma nga bad u Bah Paul u MLA ka thaiñ ngi lah iakren man la ka po ria ka jingdonkam ia ka surok kaba heh ha kane ka thaiñ, khamtam haba ka surok ha Mawbah ka long kaba rit bha bad ha ki bynta kiba sharum jong kane ka surok ki don ki lum jingtep bad ki lum jingthang jong ki jaidbynriew ki bapher bapher” ong u Bah Sanbor bad ka bynrap, ba ka long kaba donkam bha ban shna ia ka surok kaba heh da ka jingthmu ban pynsuk ia ka leit ka wan jong ki paitbah khamtam ha ka por ba ki leit on tep ne leit on thang ia ki baieid bathoin ki jongki.
U Bah Sanbor ula ai khublei ia ka tnad PWD bad khamtam ia u Executive Engineer (EE) u Bah S Lytep uba la khlad noh dang shen, uba la shimkhia bha ban pyniaid shakhmat ia kane kam. Ka tnad PWD ka lah dep ban pynkhreh ia ka Estimate bad DPR bad la phah sha ka ophis jong u Chief Engineer bad ha ka taiew ban wan, u Engineer uba thymmai un sa wan ban shimti noh ia ka kam.
“Ma nga bad Bah Paul ngin sa leit tynruh ia ka Tnad Planning bad Finance bad ngin ialeh katba lah ban pynsted ban ioh noh ia ka bhah tyngka khnang ban ioh shna ia kane ka surok” ong u Bah Sanbor.
Ula iathuh, ba ia kane ka surok kaba jrong 400 mitar tam bad jingiar ka surok ka long 7 mitar shiteng, yn shna ha ka jinglut jingsep kaba kot T.12 Klur kaban kynthup ia ka jingpynmadan ia katei ka jaka, jingker kynroh, jingshna ia ki nala, bad ban siang rong.
