Shillong, Nailar 29 : U Myntri ki kam ialehkai ka Jylla Bah Wailadmiki Shylla ha ka sngi Saitjain ula ong ba ki khusnam ban ai sha ki nongialehkai ki dei tang ka jingsdang nab aka Jylla kala pynkiew bha ia ka jingkynshew ha ki kam ialehkai.
“Da kaba ai ia phi ia kane ka khusnam mynta, ngim ong ba kala biang. Ngi ong ba kane ka dei tang ka jingsdang” ong u bah Wailad haba kren ha ka jingrakhe National Sports Day 2026 ha Shillong.
Ia kane ka jingrakhe la pynlong da ka Tnad Sports & Youth Affairs halor ka mat “Khelega Bharat, Jeetega Bharat” ban burom ia ki nongialam ba wanrah nam.
U Bah Wailad u iathuh ba ka mang tyngka ha ka Sports kala kiew na ka T.40 klur ha u 2018 sha palat ia ka T.840 klur mynta. Ula pynbna ia ka jingpynkiew ia ki song pisa ia kiba ioh khusnam kaba long-kiba ioh takma ksiar ha ka National Games kin ioh T.2 lak na ka T. 7500, katba kiba ioh takma rupa bad rnong kin ioh mar T.1.5 lak bad T.1 lak.
U ong ba ki nongjop takma ha ka National Games, South Asian Games, Asian Games bad Olympic kin shah thung kam beit beit ha ki kam Sorkar hapoh ka Meghalaya Outstanding Sportsperson Direct Appointment Policy (MOSDAP).
Uba shah thungkam nyngkong eh hapoh ka policy u dei u Pynshngain Kurbah, uba ioh takma rnong ha ka 38th National Games.
U Myntri u pyntip ba ka Sorkar kan ai ia ka stipend kilan met na ka bynta ka kynhun ialehkai jong ka 39th National Games, ka health insurance ia ki nongialehkai hapoh ka MHIS, shna haduh 125 tylli ki jaka ialehkai phutbol, bad kiwei kiwei.
Ula pynkup burom ruh ia ka Mawlai Sports Club, ka Champion jong ka 4th Meghalaya State Leagur kaba la ioh rung sha ka I-Leaque 3 u snem 2025-26 lem bad kiwei ki nongioh takma.
