Shillong, Nailar 28 : Ka Meghalaya kala bynrap shuh shuh sa palat 1000 jingthiah bad kynshew jan T.750 klur ha ki jingtei ka koit ka khiah ha ki san snem bala leit noh, pyntip u Myntri ka Koit ka Khiah Bah Wailadmiki Shylla ha ka Iingdorbar Thaw Ain hynne ka sngi Thohdieng.
Haba jubab ia ki jingkylli halor ka koit ka khiah ha ka kynta kylli jingkylli, u Bah Wailad ulaiathuh ba ki jingkynshew kila lam sha ka jingbun ki nongwan sumar sha ki jaka sumar kaba kiew na ka 17 lak ha u 2017-18 sha ka 25 lak ha u 2025-26- ka jingkiew ba kot haduh 46.8%.
U pynpaw ba ka jingkiew ha ka jingdon ki nongiohbynta jong ka MHIS da 60% kala pyni ia ka jingnang kiew ka jingshaniah u paidbah.
Halor ki prokram ka koit ka khiah ki Kmie bad ki Khunlung, u Bah Wailad u iathuh ba ka Jylla kala pynlut T.120 klur ha ki saw snem, palat ban ia ka jingpynlut ka Sorkar Pdeng ba T.110 klur. Da ka MHIS, ka jingpynlut baroh lang kala kiew sha ka T.170 klur.
U Myntri u pyntip ba hapoh ka CM Safe Motherhood Scheme, ki Longkmie bad ki Khynnah kila ioh mynta ia ka leit ka wan ba khlem jingsiew-palat 1 lak trip ha ka shisnem-na ka kyndon ba mynshuwa kaba kynthup tang ia ka jingleit buh haba leit kha Khunlung.
Ban ialeh pyrshah ia ka jingkyntait ki Kmie ba kin wan sha ki jaka sumar namar ka jingsngewkhia ia ka sumar sukher ia ki Khun, ka Sorkar kala buh ia ki transit home ha kaba ki lah ban wanrah iala ki jong ki Khun.
Ki ASHA bad ki nongap ki ioh ruh ia ka bainong kaba long T.1000 ha man ka jingkha khunlung.
“Ka jingiap ki Kmie ba kha khun kala hiar da 56% hangne-ka sien ba nyngkong ha ka histori ka Jylla-ka jingiap ki Khunlung ka hiar da 40% na ka jingkhein u snem 2021” kam u bah Wailad.
U iathuh ba ka Mother APP mynta ka buddien ia man ki kynthei ba armet haduh ki shnong ki thaw bad la pynkylla ia ka MHIS ba kan treikam khlem ka jingdon pisa.
Hapoh u Lber 2027, u ong, ka Jylla kan don 121 tylli ki PHC, 35 tylli ki CHC bad 700 tylli ki Sub Centre, kaba tam ia ki kyndon ka Ri, bad mynta ka don bun eh ia ki First Referal Unit.
