Shillong, Nailar 27 : U Myntri Rangbah ka Jylla Conrad K Sangma ha ka sngi Palei, ula ong ba ka dor jong u kubi, kaba la hiar sha ka T.2 shi kilo, kaba pynbor ia ki nongrep ban shu sam ei, mynta kala kiew biang sha ka T.20-25 shi kilo.
Ia kane ka mat la wanrah ha Iingdorbar Thaw Ain da u President ka VPP bad MLA ka Nongkrem.
Haba tuklar ha ka jingai jubab u Myntri kam rep Timothy D Shra, u Myntri Rangbah ula ong ba ka jinghiar ka dor ha u bnai Naitung ka dei kaba ju jia man ka por kaba la iohi ha kine ki 10 snem bala leit noh.
“Ngi la ju iohi beit ia ka jinghiar ka dur ha u bnai Naitung. Ka jingkhein jong ngi ka long ba ka don ka jingwan pynpoi kubi kaba bun bha na kiwei ki Jylla ka thain Shatei Lam Mihngi ha kane ka por. Ngi la khmih ia ka jingpynpoi mar baroh kawei, kynthup ka Guwahati bad kiwei ki Iew” ong u Conrad.
“Ngim lah ban ong ba ka rukom pyniaid kala jakhom haba pynshong nongrim tang ha ka shisngi. Ka jingpynpoi bun ka mar na kiwei pat ki bynta bad jingdon bun ka mar ka lah ban lam sha kane ka jinghiar don , hynrei mynta kala kot biang sha ka T.20-25 shi kilo” ula bynrap.
U Conrad ula ong ba ki don katto katne ki daw kiba ka Sorkar kam lah ban leh eiei, hynrei kala khmih bha ia ka jinglong jingman.
Shuwa kane, u Myntri ka kam rep ula ong ba ka tnad kala shimkhia ia kane ka jingjia.
“Nga la tip ia ka jinglong jingman bad nga la khot ia ka jingialang jong ka tnad rep. Ka dor kala long biang kumba ju long mynta bad kaei kaba u dkhot ula ai jingmut ngi la buh jingthoh ban leh eiei” ong u Shira.
