Shillong, Nailar 27: Ka Hynniewtrep Youths’ Council (HYC) kala dawa ban register ejahar pyrshah ia arngut ki briew kiba na Assam halor ka jingkynnoh ba ki la kren pynjah burom bad byrngem byrsit ia ka jaidbynriew Khasi bad Jaintia ha ka Facebook Live kaba la saphriang bha.
Ha ka ujor ba la mudui sha u SP ka East Khasi Hills ha ka sngi Balang, u Education Secretary ka HYC samla Enlang Sawian u la jer kyrteng ia u nongpyndonkam Facebook u “Moskan Uddin” na ka District Hojai bad u Content Creator u “Mumu Mumu” uba na Merapani, Golaghat kum u nongshah kynnoh.
U samla Sawian u la ong ba kitei ki arngut ha ka Facebook Live, kaba la pynsaphriang paidbah, la kynnoh ba ki la pynmong ia ki kynthei Khasi bad Jaintia, da kaba jer kyrteng ia ki kum ki “kynthei die met” bad kren bein ia ka jinglong jong ki bad shaphang ka u kpa ki khun jong ki.
La kynnoh ruh ba ki la pyniasyriem ia ki jaitbynriew Khasi bad Jaintia kum ki “mrad khlaw”, bad kynnoh ba ki shynrang Khasi kim don “ka lawei” bad kiba shaniah ha ki kynthei, bad ki la kynnoh ba ki kynthei Khasi-Jaintia ki donkti ha ki kam khaii beain, ong ka ujor.
Ka jingujor ka la kynnoh ba kitei ki briew kila byrngem ban leh eiei ia ki briew ka Meghalaya na ka bynta ki briew ka Assam bad kam khlem sakhi ba ka jingpyniap ia ki bym dei ki riewlum ka ju jia man la u snem ha Meghalaya.
