Guwahati, Nailar 27: Ki nongshong shnong ka No.2 Negheribil kaba don ha khappud Assam-Nagaland ha Golaghat district ki la ujor sha ki pulit ha Meraoani police station ha ka sngi Balang hadien ba ka kynhun ki briew na ka liang ka Nagaland ki la rung be-aiñ ha ka thaiñ Assam bad kynnoh ba ki la thombor ïa ki paidbah ka thaiñ.
Hadien katei ka jingjia, ka jingkulmar kaba thymmai ka la nang kiew ha katei ka thain.Ia kane ka jingujor la ai ha thanat Merapani hadien katto katne kynta ba la khot ia ka jingialang ban pynjai jai ia ka jingeh halor ka jingjia ha katei ka thain ha ka janmiet jong ka sngi Ba-ar.
Katkum ki report, la iathuh ba katei ka jingjia ka la sdang naduh ba ki kali kiba kit ia ki dieng jri ki la pyrshang ban rung sha kawei ka jaka ha Negheribil kaba dang shen ki la sakhi ia ka jingpynkynriah briew.Ki briew ka Assam na ka tnad Forest ki la pynsangeh ia ki kali ban tohkit.
“Ka jinglong jingman ka la nangjur shuh shuh haba kumba 30-40 ngut eiei ki briew, ba la ialam da u Hussain Lotha, chairman jong ka shnong Longayim bad Mikirang, ki la rung sha katei ka jaka da kaba rah ia ki tiar ialeh kiba nep bad la kynnoh ba ki la pyntieng pynsmiej ia ki nongshong shnong,” la ong uwei u nongshong shnong katei ka thain.
Kham mynshwa ha ka sngi Balang, ki nongshong shnong jong ka No. 2 Negheribil ki la ia lum ban iakren bad u Lotha kum ka jingpyrshang ban pynjai jai ia ka jingkulmar.Hynrei la iathuh ba katei ka jingialang ka la kylla long ka jingialeh pyrshah shwa ba kan sdang ia ka jingiakren.
“Kane kam dei ka sien kaba nyngkong, ki jaitbynriew Naga ki la rung ha ka thain jong ngi bad haba ngi iakynduh ia ki ki la pyntip ia ngi bad teng teng ki la thombor ia ngi.Ngi kyrpad ia ki pulit ban leh ei ei pyrshah ia ki,” la ong uwei u nongshong shnong.
U la bynrap, “Kham mynshwa kum kine ki jingjia ki ju jia hynrei ki Naga kim shym la pyrkhat iano iano ruh.Ngi long kiba tlod bor bad ngim lah ban iarap bad ngim tip shuh kumno ban leh,”.
Ki nongshong shnong ki kwah ba ka ain kan leh ei ei pyrshah ia kito kiba la kynnoh ba ki donkti bad ki la pynpaw ia ka jingtieng ioh kan dang don shuh shuh ki jingkulmar ha katei ka shnong khappud.
Kane ka jingjia kaba thymmai ka long hadien katto katne sngi ba ka Lotha Lower Range Public Organisation (LLRPO) kaba don ha Nagaland ka la kam ba ka No. 2 Negheribil ka hap hapoh ka jingpeit jong ka shnong Longayim bad Mikirang ha Nagaland.
Ka jingïakajia pud hapdeng ka Assam bad ka Nagaland ka dei ka jingïakajia jaka kaba la neh slem ha ka thaiñ shatei lammihngi, ha kaba ki jingïakynad kiba jur ki la paw ha ki distrik Sivasagar bad Jorhat jong ka Assam.
Ka la sdang na ka jingthaw ïa ka Nagaland kum ka jylla la ka jong ha u snem 1963, ka jingïakynad ka long halor ka jingïakhun ban dawa ïa ka jaka, khamtam ha ki jaka ba riewspah ha ki marpoh khyndew kum ka Sivasagar, kaba la tip na ka bynta ka jingpynmih umphniang bad slasha.
Ka Assam, ka kynnoh ba ka Nagaland, ka la wan buhai shnong ha jan 60,000 hectare ki jaka jongka, ba kynthup ia ki bynta jong ka Sivasagar, katba ka Nagaland, ka iada ia ki jingdawa jongka, da kaba pynshong nongrim ha ki pud ki sam jong ka histori, ha shuwa ka jingsynshar phareng.
Ki jingpyrshang ban pynbeit ia ki jingialeh ki la iakynduh ia ka jingjop kaba duna.Ha u bnai Nohprah 2023, u Myntri Rangbah ka Jylla Assam u Himanta Biswa Sarma bad u Myntri Rangbah ka Jylla Nagaland u Neiphiu Rio ki la ïakynduh ïa u Amit Shah myntri kam pohïing ka sorkar pdeng ban ïakren ïa ka jingpynbeit, hynrei ym shym la mih kano kano ka jingpynbeit kaba neh.
