Shillong, Nailar 27 : U Nongialam ka Liang Pyrshah Mukul Sangma ha ka sngi Balang ula ai ia ka jingkyrshanba pura ia ka resolution ka Sorkar ba pyrshah ia ka jingtih uranium kaba la mynjur da kawei ka sur ha Iingdorbar Thaw Ain.
“Nga iaroh ia ka sienjam jong ka Sorkar ban wanrah hapoh ka Iingdorbar ban ioh ia ka jingiatylli halor ka jingthmu jong kane ka resolution” ong une u Nongialam ka TMC.
U Mukul ula ong ba ki paidbah ka Jylla kila pyrshah ia kane ka jingthmu naduh ba thmu nyngkong da ka Sorkar India.
“Ka dei shisha ka jingeh kaba khraw ia kiba bun ki Sorkar namar ka jingpynbor ban mynjur ia ka jingtih. Kila don shibun ki jingjia bym sngewtynad, ka jingbym don jingshaniah bad kala kylla long ruh ka atiar sain pyrthei. Bun ki seng sain pyrthei kin pynlong atiar ia kano kano kaba don jingiadei bad ka jingsngew jong u paidbah” ula ong.
Une u Myntri Rangbah barim ula pynkynmaw ia ki jingtynjuh ha ka por ba u shimti ban pynaiid ia ka Sorkar ha u snem 2010 bad ula ai khublei ia ka Sorkar UPA.
“Nga kwah ban buh ha ka jingthmu ia ka jingai khublei naduh ka mynsiem sha ka Sorkar barim ha ka por jong u Myntri Rangbah Duh Manmohan Singh. Ngi la shimkhia ia ka jingsngew u paidbah bad iatai sani bha. Kala don ka jingshimkhia na u Myntri rangbah Duh bad ula buddien hi shimet, Shibun ki shithi ki don halor kane” ong u Mukul.
Ula ong ba ki daw kum ka jingrit ka Jylla, ka jinglong jingman ka mariang ba lah ban julor suk bad ka jingjur slap ki dei ki daw kiba dei hok shisha ym ki jingaidaw.
“Ha Meghalaya kano kano ka jingtih ia u uranium kan wanrah ia ka jingktah kaba jur bha ia ka bha ka miat ki briew. Ka jingktah ia ka koit ka khiah ka don ha ki jingthoh” ula ong.
