Shillong, Nailar 27 : U Myntri Rangbah Conrad K Sangma ha ka sngi Balang ula pyntip ha Iingdorbar ba ka jingdon ki khlaw ha Meghalaya kala hiar da 325 sqkm naduh u snem 2009 haduh u 2023.
Ia kane ka jingkhein la pynshong nongrim kat kum ka jingkhein jingdieh hapoh ka India State of Forest Report (ISFR), ong u Conrad ha ka jubab da ka jingthoh sha ka MLA ka NPP na Gambegre Mehtab Chandee A Sangma.
Halor ka jingkylli ia ki jingdon khlaw ha kawei pa kawei ka distriat bad ka jingmang pisa, jingpyllait bad jingpyndonkam ban pynrben biang ia ki khlaw hapdeng u 2014-16, 2018-23 bad 2023 haduh mynta, u CM ula ong ba ia ka jubab la buh hapoh ka Iingdorbar.
Haba kylli la ka Sorkar kan pyntreikam ia ki prokram thungdieng biang ha kylleng ka Jylla, ula jubab ba yn leh.
Ka Tnad kala thung dieng hapoh ka State Plan bad skhim ka Sorkar Pdeng kum ka CAMPA, MEPRF bad MMMRF nalor ki jingiaid ialap paidbah, ula ong.
Na ka bynta u snem 2026-26, la tyra ban thungdieng ha palat 3065.09 hectare da ka jingmang pisa ba T. 8,66,14,185.24 bad 20 km ka jingthung dieng harud ki surok ba T.1,09,70,614.
