Shillong, Nailar 26 : Ka Khasi Students’ Union (KSU) kala buhpor arbnai ia ka Sorkar Jylla ba kan pynlong ia ka Umling facilitation centre kaba treikam bad ban pyntreikam ia ka Migrant Workers Act kaba la pynkhlain, haba pdiang ia ka rai ban pynsangeh ia ki kam jong ka Shree Cement.
Hadien ka jingialang bad u Myntri Rangbah Conrad K Sangma halor ki san tylli ki mat jingdawa, u President barim ka KSU Bah Lambokstar Marngar ula ong ba ka Seng kala dawa ban khein duh noh ia ka public hearing jong ka Shree Cement bad ban sospon ia u DC bad ia u SP.
U iathuh ba ka Sorkar kala mynjur ban thaw ia ka Independent Enquiry Committee bala lam khmat da u briew ba laitluid, khlem u DP bad SP lem bad ki kynhun kiba don bynta.
“Ngi dawa ban pynsangeh pura. Ka Sorkar kala pyntip ba tad haduh ban da pyndep ka committee ia ka kaiphod, baroh ki kam jong ka Shree Cement kin sangeh lut. Ngi ngeit ba kan bat iala ka kular, hynrei lada ka pyniaid shakhmat, ngi ruh ngin leh ia kaei kaba donkam” ong u Bah Lambok.
Halor ka MRSSA 2016 bad ka khyrdop talasi mynder, u Bah Lambok ula ong ba ka KSU ka tip ba ka Amendment 2020 kala leit na u Lat ka Jylla sha ka Sorkar Pdeng ban pan jingshai bad ka Iingkashari kala dep kyntait ia ka mudui pyrshah ia ka Act 2016.
U pyntip ba 18 tylli ki entry point lah dep ban ithuh ha u snem2016 hynrei ym pat don kawei ruh kaba treikam. Watla ia ka Umling la plie ha u 2019, hynrei kala kylal long ka Covid checking centre bad hadien kum ka food court.
“U CM ula kubur bad kular ban pynlong ia ka jingiajurip lang ha Umlong bad pyntip ba ka kam kan sa sdang noh mardor. Hapoh ka arbnai, ka dei ban lah pynlong ia ka kaba treikam” ong u Bah Lambok.
Na ka bynta ka Ratacherra ha East Jaintia Hills, ula ong ba ki trai jaka kila kyntait ban ai ia ka jaka rep kwai bad u CM ula kular ban sa wad jaka biang hapoh ka 3- 4 bnai.
Halor ka Meghalaya Identification, Registration, Safety and Security of Migrant Workers Act 2020, u Bah Lambok ula ong ba ka KSU kala pynsngew ba ka dei kaba tlot bad kyntu ia ka Sorkar ban wanrah ia ki kyndon kiba iasyriem kum ka Work Permit.
“ Ngi ai jingmut ba ia ka jingpynshisha ki Pulit bad ki kyndon dain kuna dei ban pynrung khnang ban pynkhlain ia ka. Ka Kynhun Myntri kala ai jingmynjur mynta bad ka Sorkar kala pyntip ba hapoh 15 sngi yn sa pyntreikam pura ia ka” ula ong.
Halor ka NEIGRIHMS, u Bah Lambok ula ong ba u CM ula phah ia ki jingai jingmut ka KSU sha u Myntri ka Sorkar Pdeng bad kular ban sa pynbeit ia ka jingialang ba markhmat ban pynsngew ia ki jingtreikam bymhok.
Halor ka thungkam MPSC bad DSC, ula ong ba ka Sorkar kala pynthikna ba lah pynduh ia ki interview ha ka thungkam Group-C bad jan kumba 70% na ki 23 tylli ki mat jingpynkylla bala ai jingmut da ka Reform Committee u snem 2024 ia ka MPSC lah pyntrei mynta.
Halor ka jingdawa ban pynlait ia ki nongialam ka KSU, u Bah Lambok ula ong “Ngim shym la dawa ban pynlait ia ki. Haba don ki jingiakhih, ka jingkem kan don beit. Ngi ieh ha ka jingstad jong ka Sorkar bad ngin bteng ban ialeh halor ki ishu”.
 kala buhpor arbnai ia ka Sorkar Jylla ba kan pynlong ia ka Umling facilitation centre kaba treikam bad ban pyntreikam ia ka Migrant Workers Act kaba la pynkhlain, haba pdiang ia ka rai ban pynsangeh ia ki kam jong ka Shree Cement.){kind=link}