Shillong, Risaw 10: U Chief Post Master General ka North East (NE) Circle u Subrat Das hynne ka sngi nyngkong, u la pynbna ba kum shi bynta ban rakhe iaka World Post Day, kila pynkhreh ia kiba bun ki prokram na ka bynta ka jylla Meghalaya bad ka thaiñ shatei lam mihngi jong ka ri.
U Subrat Das haba iakren bad ki nongthoh khubor, u la ong, ia ka World Post Day la rakhe man la ka snem naduh ka 9 tarik haduh ka 13 tarik u Risaw kum ka jingkynmaw ia ka sngi ba sdang ia ka Universal Postal Union (UPU) ha u snem 1874 ha Berne Switzerland.
“Ka jingthmu jongka World Post Day ka long ban pynsngewthuh ia ki paidbah halor ka jingdon jong ka jingai jingshakri jong ka Postal bad kumno kala noh synniang iaka imlang sahlang bad ka roi ka par ha ka ri baroh kawei” ong u Das.
U la ong, kum shi bynta jong ka jingrakhe yn pynlong ia ki prokram bapher kum ka Vittiya Sashaktikaran Diwas, Philately Day, Mail bad Parcels Day bad Antyodya Diwas bad ia ki prokram yn pynlong ruh ha ki Divisional bad All India Level ha ka jingrakhe ia ka National Postal Week.
U Das ula ong, ba kin leit ban ai pynsngewthuh bad ban ai jingpynshai ha ki thaiñ nongkyndong ha kaba iadei bad ka jingpynrung kyrteng Aadhar, ia ki jingmyntoi ba lah ban ioh kum ka Social Security Pension, Jan Suraksha Scheme (PMJJY, PMSBY, APY), Sukanya Samiridhi Accounts, AePS bad kiwei kiwei.
U CPMG u la ong ha ka sngi kut jong ka jingrakhe yn ai jingpynshai ia ki paidbah ba kin nang ban kynshew iaka pisa ka jongi ha ki ïingdak bad yn sam ruh ia ki khusnam sha ki nongtrei jong ka Post Office kiba la trei shitom ha kiba bun ki liang ban ai jingshakri ia u paidbah.
